Hofu Sehemu ya Tatu

IMEANDIKWA NA : ARISTABLUS ELVIS MUSIBA (A.E MUSIBA)

Simulizi : Hofu

Sehemu Ya Kwanza (3)

Ilipofika saa saba usiku Paul alimwambia Fouche, “Sasa twende, mimi nitapita kwa nje wewe utapita kwa ndani. Kama nilivyokueleza, chumba chake kiko kwenye pembe ya kulia. Huwezi kukikosa kwani ni moja kwa moja. Mimi nitaingilia dirisha la bafuni ambalo ni kubwa la kutosha. Bila shaka atakuwa amelala”.

Waliondoka ndani ya gari na kutokomea gizani, Willy naye aliondoka kwenye gari baada ya kuwaona wanafanya hivyo. Alifanya hima kuelekea kwenye kijumba cha simu kando ya barabara. Alipiga simu Equator Hoteli kwani aliyokuwa anatuhumu yajidhihirisha kuwa ni kweli.

“Hallo, Equator Hotel?”, simu iliitika.

“Nipe mapokezi”, Willy aliomba.

“Mapokezi hapa”, Willy alijibiwa baada ya muda kitambo.

“Rocky Malele yupo chumba gani?”, Willy aliuliza.

“205”.

“Nipe nizungumze naye”.

Baada ya muda kidogo, sauti ya Rocky ilisikika.

“Hallo, Rocky hapa”.

“Willy hapa”, Willy aliitika na kisha aliendelea, “Chunga tai wawili wanataka kula nyama yako sasa hivi”.

“Chunga”, Rocky aliitikia huku akiweka simu chini.

Aliamka haraka kutoka kitandani na kuchukua bastola yake kutoka chini ya mto. Aliikagua.

Willy naye alitoka kwenye kibanda cha simu, akaigusa kwa chati bastola yake huku akimwemwesa.

Ilikuwa saa saba za usiku. Mjini Nairobi Maina na Mwaura walipanda ua na kuingia ndani ya uwanja wa jumba hili la kifahari la Peter Gerrit. Waliangaza na kumwona mlinzi aliyekuwa bado amekaa kwenye kijumba chake huku akisinzia sinzia. Walizunguka nyumba kwa uangalifu mkubwa ili waweze kupata mahali pazuri pa kuingilia.

“Wewe zungukia kulia na mimi nizungukie kushoto, kisha tukutane mbele”, Maina alimweleza Mwaura. “Jaribu kuangalia mahali pazuri pa kuingilia”.

“Sawa, Mzee”.

Walipokutana, Mwaura alimwambia Maina. “Kuna mlango pembeni. Nafikiri unatokea jikoni. Unaonaje tukiingilia huko?”.

“Funguo zako unazo?”.

“Ndio”.

“Na! kufuli ni la aina gani?”.

“Ni la kawaida. Nitafungua, hamna taabu”, alijibu Mwaura.

Huku kila mtu akiwa ameweka bastola yake tayari, walifungua mlango huo. Mara walijikuta wako jikoni. Wafungua na kujikuta kwenye chumba kikubwa. Walihisi hicho kilikuwa chumba cha chakula. Kwani humo ndani kulikuwemo meza kubwa iliyozungukwa na viti visivyopungua kumi na nane. Wakifanya tahadhali kubwa, walisonga mbele . Walikwenda wakiangalia chumba hadi chumba. Jumba lenyewe lilikuwa kubwa kiasi cha mtu kuweza kupotea.

“Shiii!”, Maina alimtahadhalisha Mwaura.

Alifanya hivyo kwa sababu alikuwa amesikia kitu kama mashine ya teleksi inalia kutoka kwenye chumba alichokuwa amekitazama. Huku akimuonyesha ishara abaki nyuma ili aweze kumsaidia iwapo ingetokea shida yoyote, Maina alifungua mlango ule. Mle chumbani hakukuwa na kitu, lakini bado alisikia mlio wa mashine ukizidi. Aliangaza huku na kule ndipo, kutokana na uzoefu wa kazi yake wa siku nyingi, alipouona mlango aliokuwa akiutafuta. Alibonyeza kifungo hapo ukutani na mlango ule ukafunguka. Mwaura alichungulia huku moyo wake ukipiga haraka haraka. Mara alimwona Maina anamuonyesha ishara ya kumfuata baada ya muda mfupi. Aliingia ndani na kuurudisha mlango.

Alikuta ngazi zinazoelekea chini ambazo alizifuata. Sasa alikuwa na hakika kabisa ndani ya jumba hili kulikuwamo makubwa. Alichunguza bastola yake ya kawaida na ile ya akiba. akajiweka tayari wakati akizidi kutelemka chini.

Aliufikia mlango mwingine. Huku ameweka bastola yake tayari, aliufungua. Hapo alijikuta kwenye ukumbi mkubwa uliomuonyesha kuwa alikuwa kwenye sehemu za maofisi. Alitega tena masikio yake vizuri. Ndipo alipogundua ni chumba gani ambacho mlio wa mashine ulikuwa ukitokea.

Aliangaza huku na kule na kusikia kimya, alianza kufungua ule mlango. Kwanza alifungua kidogo kiasi cha kuweza kuangalia ndani. Aliona Wazungu watatu wakiangalia mashine kubwa ya komputa ikileta habari. Wawili walikuwa wamesimama na yule aliyekaa Maina alimtambua kuwa ni Peter Gerrit. Aliweza kumtambua kwani waliwahi kuonana wakati wa upelelezi kuhusu mauaji yaliyotokea katika Visiwa vya Shelisheli.

Alirudisha mlango kidogo, akafikiri, halafu akaufungua ghafla na kwa nguvu.

“Hapo hapo mlipo!”, Maina aliamru kwa sauti kali. “Mtu akileta ushenzi amekufa!. Mikono juu!.

Waligeuka na bila kubisha wakainua mikono juu. Bila kupoteza wakati. Maina alisoma maandishi yaliyokuwa kwenye ile mashine:

“LAZIMA UTUONGEZEE WATU MAANA HATUTAKI KUSHINDWA IKIWA HATA HUYU GAMBA YUKO HAPA HAPA JIBU”.

Ghafla maandishi yalifutika.

“Peter, jibu”, Maina alimwambia Peter.

“Nijibu nini”.

Wakati huo Maina alikuwa tayari amewafikia na kuwapekuwa ili kuhakikisha kama walikuwa na silaha. Alikuta wale Wazungu wengine wanazo bastola ambazo aliwanyang’anya na kuzitupa kando.

“Maina mbona unanifuata fuata. Kazi inaitaka ama huitaki”.

“Naitaka Peter, na safari hii huwezi kunipo…”.

Ghafla chumba kikawa giza Maina alijirusha kutoka aliposimama na kuanguka kando. Wakati huo huo risasi zikamiminika pale alipokuwa amesimama. Naye alijibu mapigo huku akijiviringisha chini.

“Oh, nakufa”, sauti ya mtu ilisikika.

Watu waliobaki walifungua mlango na kukimbia nje. Huko alisikia risasi zinalia na akajua Mwaura alikuwa kazini.

Aliinuka haraka na kufungua mlango wa ukumbini alikuta maiti nyingine mbili. Aliamua kuelekea sehemu aliyosikia mlio wa risasi. Mwaura alikuwa amefanya kazi kubwa. Mara aliona maiti nyingine moja. Mambo yalikuwa yanakwenda haraka. Kumbe sehemu hiyo pia kulikuwa na ngazi nyingine. Maina alizifuata ngazi hizo. Mwisho wa ngazi chini alimkuta Mwaura ameanguka chini baada ya kupigwa risasi ya kifua.

“Bosi, wamebaki wawili tu, wawahi, Mwaura alisema kwa maumivu.

“Mwaura! Mwaura!”, Maina aliita kwa uchungu. Mwaura aligeuza macho na kumtazama Maina, kiasi akakata roho.

Machozi yakamtililika Maina.

“Umekufa kishujaa, Mwaura, mimi nitakulipizia kisasi. Natoa ahadi.

Kwa haraka alikimbia kumfuata Peter lakini alikuwa amechelewa. Kwani alisikia gari linawashwa na kuondoka. Kwa kasi.

Alirudi ukumbini ambamo kuliwa na simu. Alimpigia Mkurugenzi wa Upelelezi nyumbani kwake.

“Ni nani…?”, Mkurugenzi aliuliza kwa sauti ya kulalamika. Lakini maelezo ya Maina yalifuta mawazo yake.

“Peter amekimbia. Mwaura ameuawa katika mapambano. Majasusi sita wameuawa. Maiti zote ziko hapa nyumbani. Naomba Polisi wafike haraka ili waweze kuchukua ushahidi ambao ni mkubwa na wa uwazi. Vile vile viwekwe vizuizi kwenye barabara zinazotoka mjini hapa. Wasiliana na wenzako huko Tanzania. Nataka kujua Willy Gamba yuko wapi”.

“Sawasawa. Tuonane ofisini saa kumu na mbili. Nafikiri hapa kuna kazi kubwa”, Mkurugenzi alijibu.

“Kwaheri, mzee”, Maina alijibu halafu akaweka simu chini na kuondoka.

Fouche alikwenda katika sehemu ya mapokezi ya Equator Hoteli. Mhudumu wa mapokezi alikuwa akisinzia sinzia pale kwenye kiti.

Aliangalia kwenye bodi ya funguo na bila kusita akamwambia mhudumu. “Chumba mia mbili na ishirini”.

Yule kijana bila hata kugutuka alichukua funguo. akampatia na kuendelea kustambari.

Fouche alipanda mpaka ghorofa ya pili na kwa tahadhali kubwa alielekea chumba namba 205.

Paul alizunguka na kuuangalia ukuta. Alivaa mifuko yake ya mikono. Mifuko hiyo ilikuwa ya aina yake, kwani iliweza kushika ukutani kama sumaku. Hivyo ilimwezesha kupanda ukuta bila matatizo. Aliangalia saa yake halafu akaanza kukwea.

Baada ya Rocky kupata simu ya Willy, aliyomtahadharisha, alitengeneza kitanda chake vizuri. Alikunja Blanketi na kuifunika na shuka mpaka ikaonekana kama mtu aliyelala. Baada ya kufanya hivyo, alibana mahali na kusubiri.

Akiwa katika hali ya kunyata. Willy alijipenyeza kwenye njia kati ya Equator Hoteli na Jengo la posta kwa upande wa kulia. Kwa haraka akamuoana mtu anaelekea kwenye ukuta. Mara akahisi ni nani. Aliendelea kunyata haraka haraka mpaka akafikia usawa wa mtu yule ambaye sasa alikuwa amekaribia kushika dirisha.

“Shiii”, Willy alitoa sauti ya kustua mtu.

Paul aligeuka kumtazama mtu aliyetoa sauti hiyo. Kutokana na mwanga wa mbalamwezi. Paul alijikuta anatama kwenye mdomo wa bastola.

Willy alimwamru atelemke. Vinginevyo angemkita risasi ya matako. Kufumba na kufumbua, Paul alifyatuka kama risasi na kumwangukia Willy. Willy alipiga risasi ambayo ilimkosa Paul na wote wakaanguka chini. Bastola ya Willy ilidondoka umbali wa kama futi sita kutoka mahali walipokuwa. Hapo ndipo vita vya ana kwa ana vilipoanza. Willy alitaka kupiga mbio kuelekea kwenye bastola. Lakini Paul aliwahi kumrukia kwa pale pale chini. Hata hivyo, Willy alimpiga teke-farasi na Paul akaanguka upande mwingine lakini akaamuka mara. Hapo ndipo walipogundua kuwa walikuwa wamekutana wajuzi watupu.

Hapo mwanzo Paul alikuwa amefikiri huyu alikuwa askari wa kawaida, lakini sasa alikuwa na mawazo tofauti. Kupambana naye bila kutumia silaha isingewezekan. Alijaribu kutoa bastola yake iliyokuwa kwenye mkoba wake chini ya kwapa. Lakini Willy aligundua janja yake. Alimwahi kipigo cha karate kilichomfanya Paul aone nyota. Pale pale Paul alitoa mapigo manne ya karate haraka haraka. Lakini Willy aliyaona. Willy alimgeuzia Paul na kumpiga teke la kinena lililomwangusha chini. Alimrukia ili amumalize kabisa. Lakini Paul alijiviringisha kando na Willy akamkosa.

Lakini alijiviringisha tena kabla ya kutua na kumwahi Paul ambaye wakati huo alikuwa amechomoa bastola. Aliipiga teke ile bastola nayo ikafyatuka wakati ikitoka mikononi mwa Paul. Teke lile lile lilikuwa limevunja mkono wa Paul wa kulia. Paul aliamka ili akimbie, lakini Willy alimwahi kwa kumpiga ngwara. Alipoanguka chini Willy alimpiga Paul teke ambalo lilimvunja mbavu kama tatu hivi za upande wa kulia na hapo hapo moto ukamwishia. Akabaki kugwaya.

“Nyinyi ni nani?”, Willy alimwuliza Paul, huku amembana pale chini asiweze kufurukuta.

“Sisi ni Wazungu”, Paul alijibu kwa jeuri maana alijua huo ndio mwisho wa maisha yake, haraka sana alifikiri jinsi alivyokwisha waweka watu wengine katika hali kama aliyokuwemo kwa sasa hivi. Kwa mara ya kwanza kati maisha yake alijiwa na woga na hali ya kuogopa kifo. Hata hivyo alijuwa huo ndio ulikuwa mwisho wake kwani hapakuwa na ujanja wa kuokoka.

“Wenzako wako wapi?”, Willy aliuliza kana kwamba alikuwa akijua.

“Niko peke yangu tu”, Paul alijibu huku akisikia maumivu makali kutoka mbavuni.

“Aah, kumbe bado unafanya mchezo”, Willy alitishia.

“Kama ni kuniua si uniue tu?, unataka nini zaidi”, Paul alimuuliza Willy.

“Kwanza ujibu maswali yangu, vinginevyo bado unayo safari ndefu ya kwenda “.

“Hutapata jibu hata chembe, unapoteza muda wako”.

“Basi, kama wewe ni Kaburu leo umefika kwa wazalendo wa Afrika. Utakiona cha mtema kuni. Kama hutaki kifo chako kisiwe cha maumivu makali bora uanze kusema”, Willy alimwambia huku akigandamiza mbavu za Paul zilizovunjika.

Paul alisikia maumivu makali ambayo alikuwa hajawahi kusikia. Lakini pamoja na uchungu wote ilikuwa ni sheria ya ‘KULFUT’ kwamba hakuna askari wake kutoa siri bali kutafuta njia ya kujiua ili kupunguza muda wa mateso.

“Sema wenzako wako wapi, Kaburi wee”, Willy alimuuliza huku akizidi kumbana mbavu kwa kukandamiza mkono wake.

Mara alishitukia Paul anatoa ulimi wake nje ghafla halafu akaukata kwa meno yake kama mkasi.

“Shenzi mkubwa we!”, Willy alitukana.

Kaburu alikuwa ameamua kujiua kwa njia ya ajabu sana.

“Kweli tunayo kazi maana Majasusi hawa wa Makaburu siyo watu wa kawaida”, Willy alijisemea moyoni.

Fouche aliendelea kuziparamia ngazi kana kwamba naye alikuwa mgeni aliyefikia chumba namba 205, aliangaza huku na kule, halafu akatoa bastola yake na kujiweka tayari. Kama ilivyo desturi, bastola yake ilikuwa na kizibo cha kuzuia sauti. Alichukua funguo zake malaya akafungua kufuri la mlango.

Rocky, ambaye alikuwa ndani amezima taa lakini akiwa amevuta pazia kuacha mwanga wa mbalamwezi uingie kidogo, alisikia kwa mbali kufuli likifunguliwa. Hivyo alijiweka tayari.

Fouche alikuwa amelidhika kwamba kufuri halikupiga kelele. Hivyo alishika komeo. Kwa kasi ya umeme. Fouche alifungua mlango na moja kwa moja akamimina risasi kama kumi pale kitandani. Halafu aliingia chumbani na kuwasha taa huku akiangaza kitandani.

“Umefanya kazi nzuri”, Rocky alisema kwa sauti ya kebehi.

Fouche aligeukia kule sauti ilikokuwa inatokea na pale pale akawa amegundua jinsi alivyokuwa amedanganywa. Alijuwa mambo yamekuwa mambo. Hivyo alifyatua risasi lakini Rocky alikuwa tayari amekaa imara. Alimpiga Fouche risasi moja ya kifua akaanguka chini. Alipomkaribia alimkuta kawa maiti tayari.

“Mara Rocky akasikia kitu kinadondoka bafuni. Aliruka ili azime taa. Hapo hapo mlango wa bafuni ukafunguliwa kama radi kabla hajazima taa. Huku bastola zikiwa zimeelekezana. Alishangaa kumwona Willy.

“Chunga sana. Willy”, Rocky alisema. “Siku nyingine unaweza kuumia.

“Mimi nafikiri wewe chunga zaidi; ongeza kasi”, Willy alijibu.

Wote wakacheka.

“Umempiga sachi ?”, Willy aliuliza huku akiangalia maiti ya Fouche.

“Zaidi ya hii bastola yake”, Rocky alijibu. “Hana kitu kingine”.

“Hata yule wa nje hana kitu”, Willy aliongeza Rocky alielewa mara moja.

“Hivi ulijuaje nia ya watu hawa?”, “Kama si wewe Willy, mimi ningekuwa maiti hivi sasa.

“Hiyo ndio faida ya kuwa wengi”, Willy alisema. “Hebu chukua vitu vyako tuondoke hapa. Nitakueleza zaidi huko njiani”.

Waliondoka chumbani humo kwa kupitia dirishani.

Fouche alikwenda katika sehemu ya mapokezi ya Equator Hoteli. Mhudumu wa mapokezi alikuwa akisinzia sinzia pale kwenye kiti.

Aliangalia kwenye bodi ya funguo na bila kusita akamwambia mhudumu. “Chumba mia mbili na ishirini”.

Yule kijana bila hata kugutuka alichukua funguo. akampatia na kuendelea kustambari.

Fouche alipanda mpaka ghorofa ya pili na kwa tahadhali kubwa alielekea chumba namba 205.

“Shiii”, Willy alitoa sauti ya kustua mtu.

Paul aligeuka kumtazama mtu aliyetoa sauti hiyo. Kutokana na mwanga wa mbalamwezi. Paul alijikuta anatama kwenye mdomo wa bastola.

“Nyinyi ni nani?”, Willy alimwuliza Paul, huku amembana pale chini asiweze kufurukuta.

“Wenzako wako wapi?”, Willy aliuliza kana kwamba alikuwa akijua.

“Niko peke yangu tu”, Paul alijibu huku akisikia maumivu makali kutoka mbavuni.

“Aah, kumbe bado unafanya mchezo”, Willy alitishia.

“Kama ni kuniua si uniue tu?, unataka nini zaidi”, Paul alimuuliza Willy.

“Kwanza ujibu maswali yangu, vinginevyo bado unayo safari ndefu ya kwenda “.

“Hutapata jibu hata chembe, unapoteza muda wako”.

“Sema wenzako wako wapi, Kaburi wee”, Willy alimuuliza huku akizidi kumbana mbavu kwa kukandamiza mkono wake.

Mara alishitukia Paul anatoa ulimi wake nje ghafla halafu akaukata kwa meno yake kama mkasi.

“Shenzi mkubwa we!”, Willy alitukana.

Kaburu alikuwa ameamua kujiua kwa njia ya ajabu sana.

“Kweli tunayo kazi maana Majasusi hawa wa Makaburu siyo watu wa kawaida”, Willy alijisemea moyoni.

Rocky, ambaye alikuwa ndani amezima taa lakini akiwa amevuta pazia kuacha mwanga wa mbalamwezi uingie kidogo, alisikia kwa mbali kufuli likifunguliwa. Hivyo alijiweka tayari.

“Umefanya kazi nzuri”, Rocky alisema kwa sauti ya kebehi.

“Chunga sana. Willy”, Rocky alisema. “Siku nyingine unaweza kuumia.

“Mimi nafikiri wewe chunga zaidi; ongeza kasi”, Willy alijibu.

Wote wakacheka.

“Umempiga sachi ?”, Willy aliuliza huku akiangalia maiti ya Fouche.

“Zaidi ya hii bastola yake”, Rocky alijibu. “Hana kitu kingine”.

“Hata yule wa nje hana kitu”, Willy aliongeza Rocky alielewa mara moja.

“Hivi ulijuaje nia ya watu hawa?”, “Kama si wewe Willy, mimi ningekuwa maiti hivi sasa.

“Hiyo ndio faida ya kuwa wengi”, Willy alisema. “Hebu chukua vitu vyako tuondoke hapa. Nitakueleza zaidi huko njiani”.

Waliondoka chumbani humo kwa kupitia dirishani.

Ilikuwa saa moja asubuhi wakati F.K alipoegesha gari lake. Huku nusu akitembea nusu akikimbia , aliingia nyumbani. Majasusi wote walikuwa wanamsubiri kwa hamu.

“Eh imekuwaje?”, George aliuliza.

“Paul na Fouche wameuawa!”, F.K alijibu.

“Nini?”, Dave aliuliza kwa ghadhabu.

“Wamekufa”, F.K alieleza. “Polisi wanasema maiti zao zimekutwa Equator Hotel. Sasa hivi Polisi wanafanya upelelezi kwani watu hawa hawana rekodi kuhusu kuwa kwao nchini. Zaidi ya hayo, hakuna jibu lolote kutoka kwa Peter Gerrit, sijui kumetokea nini!”.

“Mungu wangu, maana hata Peter ameuawa?”, Dave aliuliza.

“Sijui, lakini hakuna jibu. Hivyo wanahisi kuna kitu kimetokea”.

“Oke, sasa kazi imeanza. Katika mchezo huu mambo kama haya sharti yatokee. Hivi Bon na wenzake wametupiku. Sasa ni zamu yetu kufunga kazi; F.K kazi yetu ya usiku wameisha izungumzia? George aliuliza.

“Kati ya wale watu wawili ni ofisa mmoja wa wapigania uhuru ambaye ameuawa. Yule wa sabasaba Hoteli alikuwa mfanyabiashara. Kwa hiyo hicho chumba kimekosewa”, F.K alijibu kwa sauti ya uwoga.

“Nafikiri ni lazima uifanye kazi yako vizuri, F.K sharti ulete habari sahihi maana kazi kubwa iko leo usiku. Kusema kweli kama mtafanya mchezo mtateketea nyote. nyinyi wenyewe mmeona jinsi Paul na Fouche walivyoangamia. Inatubidi kujidhatiti na kufunga kazi haraka. Jambo moja lazima niwahakikishie; hakuna kushindwa, sawa?”, George alisema kwa ukali.

“Sawa”, wote walijibu kwa pamoja.

“Oke, tuendelee na maelezo kuhusu mipango ya mashambulizi ya siku nzima”, George alishauri.

Wote walisogea ili kila mmoja wao ajue kazi yake na jinsi ya kuitekeleza.

Saa tatu juu ya alama Bon Sipele alibisha hodi kwenye chumba cha Willy, huko New Arusha Hotel, kama walivyokuwa wamepanga jana yake.

“Hakllo vipi”, Bon alimsalimia. Rocky alikuwa amejilaza kitandani.

“Wewe ni mchawi nini?, ulipotelea wapi?”, Willy aliuliza.

“Wewe mwenyewe unajuwa kwamba kujibadilisha kama kinyonga na kuwapotea watu ndio mchezo wangu”, Bon alijibu kwa mzaha.

“Hivi ulipita pale pale? Sidhani. Hata mimi nisikutambue?”, Willy aliuliza kwa mshangao.

“Mimi nilikuona umejibanza kwenye nguzo. Nikakurushia busu la uzima halafu nikawahi kwenda kulala ili leo niamke safi”, Bon alijibu.

“Si kitu. SItaki kujua ulitoka vipi”, Willy alisema. “Inatosha kukuona mzima kwani tulikuwa na wasiwasi huenda umetekwa nyara. Huo ukinyonga wako uweke iwe siri yako, kwani huenda utakufaa baadaye. Maana kusema kweli ulitupotea kishenzi. Hapo hata mimi nimevua kofia”.

“Eh, vipi, mbona kama kwamba nyinyi nyote mmelala humu maana naliona sanduku la Rocky Equator Hoteli ilijaa”, Bon aliuliza.

“Ilijaa?”, Rocky alidakia, “Hebu Willy mpashe kabla hajauliza mengi”.

“Sisi bado hatujalala kama wewe. Mpaka sasa lazima ujuwe kwamba majasusi wameshaingia hapa. Zaidi ya hayo, jana usiku tumepambana nao!”, Willy alianza kumweleza yote yaliyotokea usiku ule.

Bon alisikiliza kwa mshangao mkubwa.

Ilikuwa saa mbili na nusu asubuhi. Peter Gerrit alikuwa anazungumza na maafisa wa Uhamiaji na Ushuru wa Forodha wa upande wa Tanzania. Alidai alikuwa anakwenda Arusha kuhudhuria mkutano wa wapigania uhuru. Paspoti yake ilimtambulisha kama Askofu Peter Jackson kutoka Zimbabwe. Alipitishwa haraka haraka bila kushukiwa. Wakati ule ule Mike Maina alikuwa na mazungumzo ofisini kwa Mkurugenzi wake ofisini.

“Kama Willy yuko Arusha, basi wasiwasi wangu umekwisha”, Mike alisema.

“Kwa vipi?”.

“Kwa sababu hawa wageni wa Peter ni majasusi wa makaburu na tayari wako Arusha. Aidha Peter yuko Arusha ambako ndiko alikokimbilia ili kuungana na wenziwe”.

“Sawa kabisa. Sasa?”, Mkurugenzi aliuliza.

“Sasa naomba umwalifu mwenzako huko Dar es Salaam kuwa mimi niko njiani kwenda kuungana na Willy na wenzake. Hii ni lazima kwani nilimwahidi marehemu Mwaura kwamba nitalipiza kisasi dhidi ya Peter Gerrit”, Maina alisema.

“Unayo ruhusa”, Mkurugenzi alisema. “Heri uende kuongeza nguvu dhidi ya majahili haya yenye nia ya kuhujumu mkutano wa ukombozi kusini mwa Afrika”.

“Ahsante, mzee”, Maina alishukuru.

“Nakutakia kila la heri”.

“Nashukuru”.

“Ukifika Arusha utamkuta Willy New Arusha Hoteli. Atakuwa na habari zako. Matayarisho mengine yako tayari kama kawaida”, Mkurugenzi alimalizia.

Mike aliondoka. Wakati anatelemka ngazi alianza kumfikiria Will Gamba.

Walikuwa wamefanyakazi pamoja huko Angala kwa mara ya mwisho.

“Mbona itakuwa hatari”, alijisemea huku akimwemwesa. Aliangalia saa yake ilionyesha kuwa ni saa tatu asubuhi.

“Chakula cha mchana leo nitakula mjini Arusha”. Maina alijisemea tena.

“Hallo, naomba kuzungumza na ndugu Hamisi”.

“Wewe ni nani?”, sauti ya Katibu Muhtasi ilisikika.

“Mwambie ni mdogo wake aitwaye Willy”.

“Mbona yeye analo jina la Ki-islamu na wewe na Kikristo? Utakuwaje mdogo wake”.

“Kamwulize”.

“Haya, babasubiri”.

Baada ya muda kitambo Willy alisikia sauti kwenye simu. “Hallo, Hamisi hapa”.

“Willy. Shikamoo, mzee”.

“Marahaba. Vipi unaingia mji wa watu bila kuwaona wenyeji?”.

“Hivi sasa ndio nawaeleza wenyeji kuwa nipo”, Willy alisema.

“Sawasawa. Vipi, sasa unakuja?”.

“Nisubiri. Nitakuwa ofisini kwako mnamo dakika tano zijazo”.

“Willy alikuwa amepiga simu kutoka kwa rafiki yake karibu tu na ofisi ya upelelezi ya mkoa. Hivyo haikumchukulia muda mrefu kufika ofisi hapo.

“Eh, wewe binti ndiye unayetaka kujua ndugu za mkubwa wako wa kazi? Haya niulize vizuri au umeshamwuliza?”, Willy alimwambia Katibu Muhtasi.

Msichana yule alimwangalia Willy kwa jicho la kuibia. Alimwona ni mvulana mwenye sura ya kupendeza na nadhifu. Roho ilimdunda.

“Aha, wewe ndiye Willy”, aliuliza.

“Bila shaka”, Willy alijibu.

“Kaka yako anakusubiri. Amesema ukifika uingie moja kwa moja”, yule msichana alisema huku akilembua macho.

Willy naye alimtolea tabasamu la mwaka akamwacha amebung’aa.

Alifungua mlango na kuingia ndani ya ofisi ya Mkuu wa Upelelezi wa Mkoa.

“Lo! Mwanaume huyu anaweza kukutia kiwewe. Anavutia hasa”, yule msichana alibaki anajisemea kimoyomoyo.

Willy alifungua mlango na kuingia ndani ya ofisi ya Mkuu wa Upelelezi wa mkoa.

“Karibu, Willy”, Hamisi alitoa tabasamu.

“Ahsante, mzee”, Willy alimjibu Hamisi.

“Kazi iliyofanyika jana usiku nimearifiwa”.

“Vizuri”.

“Sijui watu hawa wameweza vipi kuingia maana polisi na sisi pia tulifanya tulivyoweza kuhakikisha kwamba watu wanaostahili tu ndio wale wanaingia nchini”.

“Mzee Hamisi, lazima ufahamu kuwa watu hawa ni majasusi wa hali ya juu. Hivyo usione ajabu jinsi walivyoingia kwani hiyo ni moja ya kazi yao”.

“Ni kweli Willy. Mimi nimeogopa sana. Jana usiku mpigania uhuru mmoja aliuawa kati ya saa tisa na saa kumi huko Maunti Meru Hoteli. Alikuwa chumbani kwake. Hii inaonyesha kwamba, kutokana na kazi mliyofanya, ni dhahiri kwamba siyo hao tu. Kuna kundi kubwa la majasusi tayari liko hapa mjini. Hivi sasa tunakabiliwa na upinzani mkubwa wa kutisha. Ingawa hata wewe uko hapo”.

“Hii ni kazi na sisi tuko hapa kwa ajili ya kazi hii. Tunachokiomba ni Mungu atusaidie tuweze kuyasaka na kuyaangamiza majahili hayo, ili mkutano uanze hapo kesho kama ulivyopangwa. Lakini nakubaliana na wewe kwamba kazi kubwa lazima ifanyike, na tutaomba ushirikiano wenu”.

“Sisi tuko hapa masaa ishirini na nne na hatutalala”.

“Vizuri. Sasa ningependa kujua kama mmekagua hoteli zote ili kuhakikisha kuwa wageni wote waliojiandikisha kulala kwenye hoteli hizi wanatambuliwa sawasawa?”.

“Hilo limefanyika baada tu ya kukuta Wazungu wamefariki”. Hamisi alijibu. “Polisi pamoja na vijana wangu wamefanya ukaguzi wa hoteli na nyumba za kulala wageni. Ajabu ni kwamba hata wale Wazungu waliouawa walikuwa hawakujiandikisha kulala mahali popote”.

“Basi hii ina maana hawalali hotelini wala katika nyumba za kulala wageni. Hivyo tunabaki na jibu moja; Majasusi hawa wanaishi nyumbani kwa mtu”. Willy aliongeza.

“Sasa huyo atakuwa ni mtu gani?”, Hamisi aliuliza.

“Hiyo ndio kazi yetu. Ninyi na sisi lazima tutafute watu hawa wanaishi nyumba gani. Ila tu nasema hii itawezekana kama vijana wenu watafanyakazi vizuri. Ili kuwa na uhakika naomba warudie kufanya ukaguzi kwenye hoteli hizo”.

“Sawa, tutafanya hivyo. Lakini ikiwa ni nyumbani kwa mtu itakuwa ni vigumu”, Hamisi alisema. “Kukagua nyumba hadi nyumba litakuwa jambo la ajabu”.

“Sikiliza mzee”, Willy alidakia. “Nyinyi hapa mnajua ni watu gani ambao mnahisi wanaweza kununuliwa kwa pesana kufanya kitendo kama hicho, watu mnaowashuku sharti kuwapeleleza usiku na mchana ili kufahamu ni nani wanaingia au kutoka kwenye nyumba zao. Kama mkihisi au kugundua kitu chochote, tafadhali tunaomba mtujulishe”.

“Mawazo yako ni sawa kabisa. Hata hilo pia nitalitekeleza”, Hamisi aliitikia.”

“Kuna habari nilizoleta ofisini kwako kuhusu magari mawili ili yachunguzwe ni ya aikina nani, sijui kama umepata majibu?”, Willy aliuliza.

“Ndio, lile walilokuwa wanaendesha wale Wazungu linaonekana halikusajiliwa hapa Arusha. Wala popote nchini Tanzania. Ni jambo la ajabu sana kwani namba za injini siyo namba za gari ya aina hiyo iliyoingia hapa nchini, bali gari aina ya Peugeot 505 na muundo wa karibuni. Tumepeleleza na kushirikiana na wenzetu wa Kenya nao wanasema nambari hiyo hawana”, Hamisi alieleza.

“Basi anchana nalo. Je, na lile gari lenye namba ARKK 5677?”.

“Gari hilo linamilikiwa na kampuni ya kitalii ya Nyota Tours and Safari ya hapa mjini Arusha. Lakini tumechunguza na wenye gari hilo. Wao wanasema gari hilo halikwenda uwanja wa ndege jana. Aidha ni watu tunaowaamini sana hapa mjini. Mwenye Kampuni hii ni Mhindi mmoja tajiri sana ajulikanaye kwa jina la Feroz Kassam; mtu ambaye anaaminiwa sana hapa mjini. Ni Mhindi wa aina yake hapa nchini.

Willy alikumbuka habari kuhusu Mhindi huyo. Alikuwa ameelezwa sifa zake siku nyingi. Hasa alisifika kutokana na misaada yake na utiifu wake kwa Chama na Serikali.

“Aha, ni nani aliyetoa majibu haya? Ni F.K mwenyewe, kama mnavyomwita, au ni mtu mwingine”, Willy aliuliza.

“Hapana. Ni meneja mkuu wa kampuni hiyo anaitwa Chris Tondo”.

“Huyo ni nani?”.

“Nilisema ni Meneja Mkuu wa Kampuni hiyo”.

“Nina maana ya kuuliza ni mtu wa namna gani kutokana na mwenendo wake kiusalama?”.

“Huyu amewahi kuwa afisa wa cheo cha juu katika Jeshi la Polisi na alistaafu kwa manufaa ya umma miaka iliyopita. Hatua hiyo ilichukuliwa kutokana na tuhuma kwamba alikuwa anasaidia wafanya magendo kuvusha mali nje ya nchi. Lakini toka siku hizo mpaka leo rekodi yake ni nzuri sana. Hajawahi kuwa na tatizo kiusalama wala katika maisha ya kawaida”.

Willy alifikiri kidogo halafu akauliza tena. “Je, katika jalada lenu kuna habari kuhusu ilikuwaje mpaka akafanyakazi kwa F.K?”.

“Hapana, bali tulifikiri aliombewa hiyo kazi na rafiki zake”.

Willy alikuwa hakuridhika juu ya Chris Tondo. Aliinuka na kuaga akisema. “Nafikiri wewe tekeleza hayo mambo tuliyozungumza halafu tuonane baadaye”.

“Sawa”, Hamisi aliitikia.

Waliagana na Willy aliondoka kwa kupitia mlango wa Katibu Muhtasi.

“Wewe unaitwa nani?”, Willy aliuliza.

“Naitwa Carol!” Yule msichana alijibu huku moyo wake ukimdunda.

“Iko siku Carol”, Willy alimwambia Carol huku akifungua mlango na kupotea.

Alimwachia Carol kiu ya maelezo zaidi Willy alipoondoka pale ofisini aliamua kwenda Nyoka Tours and Safaris.

P.G aliwasili nyumbani kwa F.K kwa miguu baada ya teksi kumtelemsha karibu na ofisi ya mbao. Alisema amedai ndiko alikokuwa akienda ili kununua mbao za kununua. Alitembea kwa tahadhari kubwa. Ilikuwa saa nne na nusu alipojipenyeza kwenye ua wa nyumba ya F.K na kubisha hodi. F.K ndiye aliyefungua mlango. Alishangaa kumwona P.G.

“Hakuna mtu aliyekuona unakuja huku?”, F.K alimwuliza huku uso wake ukionyesha huzuni na mashaka.

“Hakuna, F.K”.

“Karibu ndani, P.G”.

“Ahsante”.

F.K alimwongoza P.G mpaka kwenye chumba cha siri. Majasusi wengine walikuwa ndani wanapumzika. Walipomwona walipomwona tu P.G wote walikaa kitako huku wakihisi kuna tatizo limetokea.

“Hebu tupe habari”, F.K aliomba.

P.G alieleza yote yaliyotokea usiku ule na jinsi alivyokuwa ameamua kuja kuwaongezea nguvu wenzake baada ya kupoteza watu wake wote na kubaki yeye na mtu mmoja tu.

“Hivi nimemwacha Smith Namanga. Ataingia hapa mchana huu. Nimeona siyo vizuri sisi wote wawili kuja pamoja mchana huu”, alisema P.G.

“Pole sana”, walimjibu kwa pamoja.

Baadaye F.K naye alimweleza mambo yaliyokuwa yamewatokea.

“Hii ina maana kwamba mpaka sasa hivi mambo hayaendi vizuri. Lakini nina hakika tutashinda maana sasa tunajua nguvu za adui; na yeye hajui nguvu zetu wala maskani yetu”. F.K alieleza.

“Sasa mipango ikoje”, P.G aliuliza.

“Mipango iko kama ifuatavyo”, F.K alieleza. “Usiku tutagawanyika mafungu mafungu. Kwanza lazima tuwamalize hawa watu watatu sababu ni kwamba sasa tunafahamu vyumba vyao na hoteli. Vile vile sasa tunafahamu mienendo yao. Muda mfupi tu uliopita Chris alinipigia simu. Amesema kwamba amepata habari kuwa Willy Gamba amemwambia Mkuu wa Upelelezi kwamba hakuridhika na maelezo kuhusu gari letu nambari ARKK 567. Ameongeza kuwa Willy angeendelea kufanya uchunguzi kuhusu gari hilo. Hivyo nimemwasa Chris ajaribu kumkwepa Willy maana huyo ndiye mtu hatari zaidi. Yeye ndiye aliyefanya mauaji ya jana”.

“Je, huyu Mkuu wa Upelelezi yuko upande wetu?”. P.G aliuliza.

“Ndio na hapana”, F.K alijibu. “Huyu Mkuu wa Upelelezi wa Mkoa ni mtu ambaye tumemsaidia sana kifedha. Zaidi ya hayo yeye anaamini kwamba sisi ni watu wanaotii sana Serikali. Kutokana na misaada yetu kwake, neno lolote linaloweza kutudhuru sisi yeye atatusaidia kwa kila njia. Lakini akijua ukweli katika swala kama hili, lazima atatuuza. Kutofanya hivyo kunaweza kuwa na yeye kupoteza kazi yake au hata kupewa adhabu kali ya kifo kama mhaini. Kusema kweli wanamwogopa sana Willy”.

“Hao viongozi wa wapiganian uhuru watakaohutubia mkutano wameshaisha fika”.

“Watatu wamefika na wengine wawili watafika jioni hii, kuhusu wale ambao wamefika tayari tumechukua habari juu yao. Mienendo yao pia tumeisha ifahamu. Hata wale wawili wakiingia tutapata habari zao. Kama ujuavyo P.G, mimi naaminika hapa kama mwanamapinduzi. Habari zozote ninazozitaka nazipatamoja kwa moja kutoka kwa watayarishaji wenyewe wa mkutano huo. Hivyo lazima tuwafungie kazi hawa viongozi leo usiku, halafu tuone kama mkutano utafunguliwa”, F.K, alisema.

F.K alisema. “Sasa hivi natoka ili nikamilishe mipango ya usiku kwa kupata habari zaidi. Na wewe Peter, George atakupa mipango yote ambayo tumeifanya kwa ajili ya usiku. Kwa vile na wewe umeongezeka. ni dhahiri kwamba tutashinda. Tutatenda kitendo ambacho kitaiacha dunia nzima inagwaya”.

“Vizuri. Mimi nitaelewana na George halafu nitapumzika maana mpaka sasa sijalala. Wewe kakamilishe mipango hiyo kuhusu kazi”, P.G alijibu huku yeye na George wakielekea chumba kingine

Willy alikaribia ofisi za Nyota Tours and safaris. Hapo hapo alimwona msichana mrembo sana akitoka nje ya ofisi hiyo. Kila wakati Willy alipokutana na wasichana warembo namna ile aliwaona kama sumu kwake kwani alikuwa mgonjwa sana juu yao.

Willy alibana kwa mbali kidogo ili aweze kuyapa nafasi macho yake yapate chakula chake. Alipenda amwone vizuri mrembo huyu ambaye aliumbwa ili wanaume wajisikie raha. Willy aligundua kwamba hakuwa yeye peke yake aliyekuwa anamwangalia, bali wanaume wengine pia walikuwa wanalisha macho yao kwa chati.

Msichana huyu alitembea mpaka kwenye gari moja. Alitoa funguo kwenye pochi yake na kusimama ili afungue mlango. Willy alijuwa kuwa gari hiyo mpya aina ya Toyota KE 30, ilikuwa ya huyo msichana. Lakini hakushangaa kwani msichana mrembo kama yule angeweza kumpata mtu yeyote mwenye pesa akamnunulia kitu chochote. Hata gari angemnunulia ili mradi tu aridhike.

Wakati huyo msichana anaingiza funguo kwkenye tundu la kufuri katika mlango wa gari. Ghafra akatokea kijana. Alikwapua pochi yake halafu akakimbia. Huku akiwa ametoa jisu kali alitisha mtu yeyote ambaye angethubutu kumfuata. Yule msichana wa watu alitoa sauti kali yenye kutia hofu halafu akaanguka chini. Watu waliokuwa karibu walisambaa kwa kuogopa hilo jisu kali.

Willy ambaye alishuhudia kitendo hicho cha kijambazi, alianza kumfukuza yule kijana. Alipoona kuwa watu wote wamesambaa isipokuwa mtu mmoja tu aliyekuwa bado anamsakama, yule kijana alisimama kumsubiri Willy apambane nae ana kwa ana.

“Hunijui mimi eh? Mji mzima wananijua mimi ni nani… sogea nikukate kichwa “, alitamba yule jambazi kijana.

willy alimwendea kwa tahadhari kubwa huku watu wote wakipiga makelele kumsihi arudu nyuma kusalimisha maisha yake. “Rudi, rudi! Kimbia! huyo ni mwuaji! Anamaliza watu hapa”.

Kama kwamba hasikii Willy alizidi kumsogelea yule jambazi. Mara yule jambazi alimvamia Willy kama mchezo vile. Willy alikwepa shambulizi la kwanza na lile jisu. Alimnasa mkono wake na kumkata mkono mmoja wa karate kwenye bega lile jisu lilianguka. Willy alilipiga ngwala lile jambazi mpaka chini. Kuona vile yule msichana alikimbia mpaka pale. Huku akiwa ameshikilia kiatu chake mkononi alimpiga na kisigino yule jambazi. Hapo ndipo watu wengine walipofika pamoja na polisi wa doria. Akiwa ameshika pochi aliyoporwa, Willy alimvuta kando yule msichana.

“Ahsante sana”, msichana alimwambia Willy. “Ahsante bwana. Sijui nikushukuru vipi kwa kujitolea maisha yako ili kuokoa mali yangu”.

“Sijali”, Willy alisema. Kwa mtoto kama wewe. Kila mwanaume kamili yuko tayari kujitoa mhanga maisha yake”.

Polisi alimfuata Willy akimtaka akatoe maelezo ya wizi huo katika kituo cha polisi. Lakini Willy alimnong’oneza Polisi huyo naye akamwacha huru. Huku amemfunga pingu jambazi yule na kundi la watu walimfuata. Polisi alianza safari kuelekea kituo cha polisi. Alimwacha Willy akizungumza na yule msichana hapo pembeni mwa barabara. Yule msichana alianza kutokwa na hofu na kurejea katika hali ya kawaida. Sasa alimwangalia yule kijana aliyekuwa ameokoa mali yake. Alikuwa kijana mwenye sura ya kupendeza sana. Vile vile alikuwa na kitu kingine ambacho ilikuwa vigumu kukieleza. Huyo kijana alisisimua damu yake.

“Ehe, unaitwa nani?”, Willy alimwuliza.

“Naitwa Nyaso”, msichana alijibu.

“Nyaso tu, basi?”.

“Ndio, Nyaso tu basi! Na wewe waitwaje?”.

“Mimi naitwa Willy”.

“Oh, vizuri. Sijui nikupe nini Willy!”.

“Usijali, sasa hivi nina shughuli. Tunaweza kuonana jioni mnamo saa kumi na mbili hivi, angalau kwa muda mfupi, niweze kukununulia kinywaji”, Willy alimwuliza.

Nyaso alifikiri sana kwanza. Alimwogopa sana F.K. angechukia ikiwa angejua alitoka nje na mtu, hasa mtu mgeni. Hali hii aliipima na jinsi F.K. alivyokuwa hataki kumwona siku hizi kwa kisingizio eti alikuwa na shughuli nyingi. Alifikiria sana jinsi F.K. alivyokuwa amemkaripia eti kwa kumpigiapigia simu nyumbani kwake wakati yeye alikuwa na kazi nyingi. Kama namna moja ya kumkomoa F.K. Nyaso alikubali mwaliko wa huyu kijana ambaye alimsisimua damu.

“Sawa, una miadi!” Nyaso alijibu.

“Arusha, Oke, nichukue hapo New Arusha saa kumi na mbili kamili”, Willy alisema.

“Nitafika bila kukosa”, Nyaso aliahidi.

Huku akitingisha matako yake huku na huku, alielekea kwenye gari lake na kumwacha Willy ameshikwa na butwaa. Alipoingia ndani ya gari Nyaso alimrushia busu Willy ambaye alisikia kama vile moyo wake umekosa pigo moja. Nyaso alipopotea ndipo Willy alipokumbuka safari yake ya kwenda kwenye ofisi ya Chris Tondo, ambayo ilikuwa karibu na hapo alipokuwa. Vile vile ndipo alipogundua kwamba Nyaso alikuwa anatokea kwenye ofisi ile ile wakati alipovamiwa.

Chris Tondo alikuwa katika pilika pilika humo ofisini kwake. Alikuwa akikusanya makaratasi na kutatunza kwenye visanduku. Alifanya shughuli hii haraka ili atoke ofisini. Alikuwa ameambiwa na F.K kufanya hivyo ili Willy asije kumkuta.

Wakati huo huo Willy alifika kwenye ofisi za Nyoka Tours and Safaris.

“Habari za leo”, Willy alimsalimia kijana mmoja aliyekuwa kwenye ofisi ya nje.

“Nzuri, mzee. Nikusaidie nini?”.

“Naomba kumwona ndugu Chris Tondo”.

“Una miadi naye”.

“Yupo?”, Willy aliuliza.

“Ndiyo yupo, lakini huwezi kumwona huna miadi”, kijana alisema

“Mimi ni rafiki yake. Ukinirudisha bila kumwona halafu akasikia umefanya hivyo ujuwe wewe huna kazi”, Willy alitishia huku akielekea kwenye ofisi iliyoandikwa Meneja Mkuu.

Aliwaacha wafanyakazi wote kwenye ofisi ile wakimwangalia wasijue la kufanya. Alifungua mlango na karibu wagongane na Chris Tondo ambaye pia alikuwa anafungua mlango huo ili atoke nje.

“Oh, pole sana”, Willy alisema.

Tondo alipogundua huyo alikuwa Willy, alisikia moyo wake unapiga haraka na akashindwa kupumua sawasawa.

“Karibu”, Tondo alijikuta amebabaika.

“Ahsante”, Willy aliitika huku akifunga mlango nyuma yake.

“Hawa vijana hawakunieleza kuna mgeni”, Tondo alisema huku akionyesha kukasirika.

“Samahani, kwa kweli wao hawana kosa kwani ni mie ambaye sikuwasikiliza”, Willy alijibu.

“Ehe, nikusaidie nini ndugu…?”.

“Willy Gamba”, Willy alimalizia.

Tondo alishangaa kumsikia Willy akijitambulisha kwa jina lake la kweli kwani alifikiri angejificha. Hii ilimtia hofu zaidi.”Ya, nikusaidie nini ndugu Gamba?”.

“Natumaini wewe ni ndugu Tondo. Meneja Mkuu wa Kampuni hii?”, Willy alimwuliza huku akimtazama machoni.

Moyoni Tondo alijua mambo yameanza kutibuka. Alijisikia kujuta kwani alifahamu jinsi gani Willy aliweza kusoma mawazo ya mtu aliyezungumza naye. Kitu hicho ndicho kilichomfanya Willy kufanikiwa katika kazi yake ya upelelezi. Tondo alitafakari alipoulizwa vile.

“Ndio”, Tondo alitumia uzoefu wake wa kipolisi kujibu swali hilo. Kwani alifahamu majibu mafupi yalikuwa mazuri kwa mtu anayehojiwa.

“Mimi ni afisa usalama kutoka Dar es Salaam. Nimefika hapa kwa shughuli za kiserikali. Nimeshawishika kuzungumza na wewe niliposikia uliwahi kuwa afisa wa cheo cha juu katika idara ya polisi”.

“Vizuri”, Tondo alijibu huku akishangaa kuona jinsi Willy alivyokuwa akijieleza.

“Sijui uliwahi kufika kwenye uwanja wa ndege jana usiku?”, Willy aliuliza.

Mate yalimkauka Tondo alipofikiri juu ya uwezekano kwa kwamba Willy alikuwa amemwona wakati anatoa upepo ndani ya gari. Tondo alijuwa watu kama hawa walikuwa hatari.

Baada ya kusita kidogo, alijibu kwa sauti hafifu. “Hapana!”.

“Nasikia gari nambari ARKK 567 ni lenu?”, Willy alimpachika swali Tondo.

“Ndio”.

“Nani huwa analiendesha mara kwa mara?”.

“Unajua sisi tunafanya kazi ya kuhudumia watalii. Hivyo tunayo magari mengi na madereva wengi. Hatuna dereva maalum kwa gari fulani”, Tondo alijibu.

“Nani alikuwa anaendesha gari hilo jana?”.

Tondo alisita kujibu kwani alijua jibu la swali hili lilikuwa muhimu sana kwa Willy.

“Jana halikutoka”, Tondo hatimaye alijibu.

Willy alijua alikuwa ameongopa tena.

“Kwa nini, lilikuwa bovu?”.

“Wakati tunapokuwa hatuna kazi nyingi, magari yetu hufungiwa tu katika gereji”.

“Gereji yenu iko wapi?”.

“Iko nyuma tu ya ofisi hii”, Tondo alijibu.

“Kwa hiyo gari haliwezi kutoka bila ruhusa kamili”, Willy alipendekeza.

“Kabisa”.

“Oke, ndugu Tondo, vizuri. Samahani kwa kuchukua muda wako”, Willy alisema huku akiwa amesimama tayari kuondoka.

“Hivi kuna jambo gani kuhusu hilo gari? Naona sina budi niulize”, Tondo aliuliza.

“Wewe umekuwa afisa wa polisi kwa muda mrefu, kwa hiyo ni lazima unaelewa mambo haya”, Willy alimjibu. “Wakati mwingine tunapata habari fulani fulani. Inatubidi kuchunguza na kuthibitisha, vinginevyo watu wanaweza wakaumia bure”.

“Ni kweli”, Tondo alijibu.

“Oke, kwaheri”.

“Karibu tena, ndugu Gamba”.

“Willy alifungua mlango na kutoka ofisi ya nje. Aliwaaga wale wafanyakazi wa ofisi ile.

Tondo alirudi akaa kitako kitini mwake na kuanza kufikiri.

Willy alipotoka tu nje alitembea haraka sana na kuzunguka nyuma ya ile ofisi. Huko aliona lango la kuingilia katika gereji. Alibisha hodi maana lilikuwa limefungwa. Mara mlinzi alifungua. “Tukusaidie nini, mzee”, aliuliza yule mlinzi.

“Jana nilipewa lifti na ndugu Tondo. Lakini kwa bahati mbaya nilisahau miwani yangu ndani ya gari lake. Sasa amenishauri nije nikaangalie kama bado imo iwapo gari hilo halijatoka”, Willy alijibu.

“Ahaa, gari alilokuwa anaendesha jana. Si ni lile ARKK 567?”.

“Nafikiri”, Willy alijibu.

“Basi, limetoka kwenda kujaza mafuta kwenye kituo chetu”, alijibu mlinzi.

“Siyo kitu, nitamwambia yeye anitazamie miwani hiyo wakati gari likirudi”.

“Haya, kwaheri”, mlinzi alijibu huku akirudisha lango.

“Kwaheri”, Willy alijibu huku akimwemwesa.

Ilikuwa saa saba na nusu za mchana. Willy, Bon na Rocky walikuwa wakila chakula pale pale New Arusha Hoteli. Ilikuja simu ambayo ilimhitaji Willy.

“Wewe mzee ndiye Willy Gamba?”, mhudumu mmoja alimwuliza Willy.

“Ndio”.

“Kuna simu yako”.

“Sawasawa”, Willy alisema huku akiweka kisu na uma kwenye sahani.

ITAENDELEA