Hofu Sehemu ya Nne

IMEANDIKWA NA : ARISTABLUS ELVIS MUSIBA (A.E MUSIBA)

Simulizi : Hofu

Sehemu Ya Kwanza (4)

Alikwenda kusikiliza simu.

“Hallo, Willy hapa”, Willy alisema baada ya kuunyakua mkono wa simu na kuupachika katika sikio lake la kushoto.

“Hapa ni mapokezi. Kuna mgeni wako ngoja uzungumze naye”.

Hallo, Mike Maina”, sauti ilisikika.

“Wewe unafanya nini hapa”, Willy aliuliza kwa mshangao kwani alikuwa hakumtegemea.

“Nimekuja kukutafuta. Kwani wewe unafanya nini hapa”, Maina aliuliza.

Willy alifahamu kwa nini Chifu alikuwa amemtafuta; Maina alikuwa ameletwa ili kuongeza nguvu.

“Njoo kwenye ukumbi wa maakuli. Utatukuta kwani nafikiri una njaa”, Willy alimwambia.

“Nitakuja kwa haraka kama jeti”, Maina alijibu.

Maina alimkuta Willy na wenzake wakiendelea kula chakula.

“Hallo Maina, karibu”, Willy alimkaribisha Maina huku wenzake wakisimama.

“Ahsante Willy, mambo?”, Maina aliuliza.

“Mambo ni segemnege”, Willy alijibu huku akivuta kiti na wote wakakaa.

“Hebu nikujulishe kwa hawa ndugu zetu hapa. Naamini hamfahamiani”, Willy alisema. “Huyu ni Bon Sipele wa wapigania uhuru na huyu ni Rocky Malele wa Zimbabwe”.

Kisha Willy alimgeukia Maina na kusema. “Na huyu jamani ni Mike Maina kutoka Kenya”.

Wote walisalimiana.

“Nilipata habari zake Angola alipokuwa naye. Mlifunga kazi takatifu”, Bon alisifia.

“Basi, huyu ndiye Mike Maina”, Willy alisisitiza.

Mhudumu alifika mezani na Maina akaagiza chakula.

Wakati huo Willy, kwa sauti ya chini, alikuwa anaeleza sifa za kipelelezi za kila mmoja.

“Basi mambo yanazidi kujipa”, Rocky alisema.

“Sasa Mike, tupe habari za huko Nairobi. Nikisoma sura yako nahisi kuna mambo”, Willy alichokoza.

“Haya, nisikilize kwa makini halafu na nyinyi baadaye mnijulishe mambo ya hapa”, Mike alisema.

Mike aliwaeleza yaliyotokea Nairobi huku akiendelea kula chakula. “Nilipopita mpakani leo nilishangaa. Nilikuta rafiki yangu Peter Gerrit kaishapita. Alitumia jina la Peter Anderson na kudai yeye alikuwa ni Askofu kutoka Zimbabwe akija kuhudhuria mkutano wa wapigania uhuru. Kwa sababu hiyo maafisa usalama na uhamiaji wakampitisha haraka. Hivyo yuko hapa na mnaweza kuona wenyewe hali ya mambo”.

“Kwa hiyo rafiki zangu”, Willy alimalizia. “Mji huu umeingiliwa na balaa. Bila shaka damu itamwa

gika. Tuwe tayari kujitoa mhanga ili wale watakaobaki wawezi kufaidi matunda ya uhuru. Uhuru ni kitu muhuimu kwetu na kwa vizazi vijavyo”.

Bon alisema. “Na sisi watu wa Afrika Kusini tunaamini kwamba kabla ubaguzi wa rangi haujatokomezwa ni lazima damu ya wazalendo itamwagika. Tuko tayari kwa yote hayo. Kama mnavyosikia, hata vijana wadogo wameamua kujitoa mhanga ili kutokomeza utawala wa Makaburu kwa faida ya walio wengi. Kwa hiyo Willy, mimi niko tayari kufa kwa ajili ya nchi yangu. Lakini kabla sijafa, nitahakikisha nao wanakiona cha mtema kuni”.

“Kwa sasa hivi mipango gani?”, Mike aliuliza.

“Kwanza kabisa nimempigia simu mtu wetu hapa, ambaye ni Mkuu wa Upelelezi Mkoa, Ndugu Hamisi”, Willy alieleza. “Ameweka vijana wa kumfuatilia Chris Tondo. Ninayo imani kuwa yeye anaweza kutufikishia walipo hawa majasusi. Sina shaka mtu huyu anahusika nao kwa namna fulani”.

“Kama inao uhakika”, Mike alishauri. “Kwanini tusimufuate sisi wenyewe, ikibidi tumsakame mpaka atueleze tu? Wewe mwenyewe unajua kuwa tuna uwezo wa kumfanya mtu hata mwenye kichwa ngumu kama, atatapika maneno”.

“Hapana, tusifanye haraka, maana watu kama hawa wanazo mbinu nyingi”, Willy alieleza. “Lakini hata sisi tunazo mbinu zetu. Tunaweza kumfanya akatueleza mahali walipo bila kutumia nguvu zetu nyingi. Unajuwa bado tunahitaji nguvu zetu hasa kwa kupambana na hawa majahili”, alieleza Willy, halafu akaanza kuwapa mipango kwa ajili ya usiku ule”.

“Sisi tutasimama badala ya hawa viongozi wa wapigania uhuru. Sisi pamoja na wao ndiyo wanaowindwa. Hivyo kuanzia saa tatu tutajipoteza maana watu hawa watakuwa wanatuvinjari”.

“Tumekuelewa barabara”, Rocky alidakia. “Na ninaamini mipango yako ni sawasawa kabisa”.

“Mike, kula”, Willy alishauri mara mhudumu alipoleta chakula. Mhudumu alipoondoka. Willy na wenzake waliendelea na mazungumzo yao.

Ilikuwa saa nane za mchana wakati F.K aliporudi. Alikuta wenzake wamelala. Walihitaji usingizi kwani usiku huo walitarajia kuwa macho. Alienda moja kwa moja kwenye chumba ambamo Peter Gerrit, George na Dave walikuwa wamepumzika.

“Karibu, F.K”, George alimkaribisha. Yeye tu ndiye aliyekuwa hajalala. “Una mapya yapi?”.

“Ninayo mengi”, F.K alijibu. Wakati huo huo Peter na Dave wakazinduka kutoka usingizini.

“Kwanza Tondo nimemkuta ofisini?”, F.K aliuliza. “Anasema kuwa Hamisi alimpigia simu na kumweleza kuwa Willy alimshauri aweke vijana wa usalama kumfuatilia na kuripoti mienendo yake yote. Hivyo nimemshauri akitoka ofisini aende moja kwa moja nyumbani kwake na asitoke”.

Aliposikua hivyo George aliinuka kitandani.

“Hapana F.K”, George alisema na kuinuka kitandani. “Tondo lazima auawe”.

“Auawe? Hapana, mtu huyu ametusaidia sana”, F.K alimtetea Tondo. “Lazima aishi ili naye aweze kufurahia ushindi. Bila yeye mimi nisingeweza kufanya yote niliyofanya hapa nchini. Taarifa zote za kijasusi nilizoleta ni kutokana na msaada wake, kwani yeye alikuwa afisa wa cheo cha juu katika jeshi la polisi. Hapana, George, Chris Tondo lazima aishi ili afaidi matunda ya ushindi wetu. Vile vile nimeamua kwenda naye Afrika Kusini baada ya kazi ya hapa”.

Wale majasusi wengine walimwangalia kwa macho makali yenye kutoa onyo.

“Nafikiri litakuwa jambo la busara kwako kufanya hivyo”, P.G. alimwasa F.K.

Wakati wenzake walipokuwa wamepumzika, mnamo saa kumi za mchana, Willy alimpigia simu ndugu Mbeki. Mbeki alikuwa Mwenyekiti wa kamati ya kutayarisha mkutano. Alikuwa amefikia Maunt Meru Hoteli.

“Hallo. Maunt Meru hapa”, mpokeaji simu alisikika akisema.

“Nipe chumba 321”, Willy alisema.

“Subiri”.

“Hallo, Mbeki hapa”.

“Aha, nimepata habari kuwa unanitafuta”.

“Sawasawa, naomba uje tuonane hapo kwenye klabu ya Kituo cha mikutano ya Kimataifa. Unaifahamu?”, Willy aliuliza.

“Basi, jitahidi uwe pale katika muda wa dakika kumi zijazo”.

“Haya”.

Willy aliweka simu chini na kutelemka chini.

Alichukua teksi na kuelekea AICC Klabu.

Alipofika alisubiri kidogo na Mbeki akawasili. Willy alikuwa anajulikana sana mahali hapo. Aliongozana na Mbeki mpaka kwenye kibanda kimoja, halafu wakaagiza vinywaji.

“TUmekuwa na wasiwasi sana baada ya matukio makubwa ya jana”, Mbeki alianza.

“Hiyo ndiyo sababu imetuleta hapa”, Willy alijibu.

“Ulinzi wa Polisi unaonekana ni dhaifu sana”, Mbeki alisema. “Viongozi wote wanawasili leo jioni, tayari kwa mkutano wa kesho. Sasa mimi ninao wasiwasi. Kuna mtu ambaye anatoa habari zetu nje, lakini hatujui ni nani”.

“Mimi nashauri kuanzia sasa mtoe habari kwa mtu yeyote. Ikibidi punguzeni watu hata kwenye kamati ya matayarisho. Bakizeni watu tunaowafahamu fika. Sasa nisikilize kwa makini. Nataka ufanye kama nitakavyokueleza. Usikose hata chembe, kwani ukikosea, kutatokea balaa isiyoelezeka”, Willy alitahadharisha.

Alianza kumweleza Mbeki juu ya mipango yote ya usalama wa mkutano kuanzia dakika ile mpaka mwisho wa mkutano. Alimweleza mipango ya ulinzi wa wajumbe, na viongozi mashuhuri wa wapigania uhuru.

NYASO

Ilikuwa saa kumi na mbili juu ya alama, Nyaso alipoegesha gari lake hapo New Arusha Hoteli. Willy alikuwa anaranda pale nje ya hoteli akimsubiri.

“Nimeamini kuwa unajuwa kuweka ahadi mtoto we, Wasichana wengi wa Kiafrika hawaweki muda maanani”, Willy alisema huku akifungua mlango wa gari na kuingia ndani.

“Wacha kutuonea, siku hizi tumebadilika, hujui kuwa wakati huu unajulikana miaka ya elekttroniki! Watu lazima kwenda kwa wakati”, Nyaso alijibu huku akiondoa gari.

“Unanipeleka wapi?”, Willy aliuliza.

“Nilipiga simu ‘Kambi ya Fisi’ na kuomba watuwekee nyama ya kuchoma”, Nyaso alijibu.

“Hiyo ni maridadi”, Willy aliitikia aliitikia halafu akaendela. “Vipi maisha hapa”.

“Mwenyezi Mungu anatusaidia”.

“Umeishi hapa Arusha kwa muda mrefu?”.

“Miaka mitano hivi”.

“Mimi nakuja hapa mara kwa mara lakini sijawahi kukuona, sijui huwa unajificha wapi?”.

“Mbona maswali mengi? Unajuaje, huenda mwenzio nimewekwa kinyumba?”, Nyaso alimtolewa Willy jicho la kiwiziwizi.

“Unasema kweli, hebu nisiulize maswali mengi kwani ninaweza kujiumiza roho bure”.

“Pole sana”.

Waliendelea na safari mpaka ‘Kambi ya Fisi’.

Walipowasili Willy aligundua kuwa wahudumu wa pale walikuwa wanamfahamu sana Nyaso. Hiyo ilitokana na kwamba walipowasili Willy aliona wahudumu wakimkimbilia Nyaso na kuwapa mahali pazuri pa kukaa.

“Nyama uliyoagiza karibu itakuwa tayari”, mhudumu alisema. “Utasubiri kidogo tu”.

“Hakuna tabu”, Nyaso alijibu wakati wakikaa kwenye viti.

Watu wengi walikuwa pale ambapo pia walikuwa wamekuja kuchoma nyama.

“He, leo ni maajabu! Umemwona Nyaso kaja na mwanaume! Siyo maajabu haya?”, kijana mmoja aliwauliza vijana wenzake wapatao watano.

“Huenda ni kaka yake”, kijana mwingine alisema. “Huoni kuwa hata kijana mwenyewe anayo sura nzuri”.

“Watu wanasema eti Nyaso hana ndugu, sasa huyo kaka katoka wapi”, kijana wa kwanza alidadisi.

“Ya nini kuingilia maisha ya watu? Ndio sababu nyinyi waswahili hamwendelei. Mnapenda kuchunguza maisha ya wengine huku yale ya kwenu yanawashinda. Kama huyo kijana kaka yake au bwana yake nyinyi inawahusu nini? Iwapo mtu anavutiwa si heri akatafute nafasi yake halafu abahatishe tu? Vinginevyo kama Nyaso kapata bwana mwingine na kumwacha F.K hicho ni kilio chake F.K”, kijana mwingine aliyeonekana kuwa mkubwa kidogo kuliko wengine aliwaasa wenzake. Hivyo iliwabidi kujali yaliyowaleta.

“Unafanya kazi wapi?”, Willy alimwuliza Nyaso wakati wakinywa vinywaji baridi.

“Sasa hivi sifanyi kazi yoyote, ila naadaa kitabu”.

“Eh, kitabu kuhusu nini?”.

“Kinahusu uchumi wa nchi yetu”.”Wewe ni mtaalam wa mambo ya uchumi?”.

“Ndiyo. Ninayo shahada ya kwanza katika uchumi”.

“Ahaa vizuri sana. Hata mimi ni hivyo hivyo”.

“Na wewe unafanya kazi gani?”.

“Mimi niko Dar es Salaam ambako ninafanya biashara”.

“Na hapa Arusha umekuja kufanya nini?”.

“Mimi ni shabiki wa siasa, hivyo nimekuja kusikiliza mkutano wa hawa wapigania uhuru”.

Nyaso alimwangalia bila kuamini masikio yake.

“Mkutano kama huu utakusaidia nini na wewe ni mfanya biashara?”, Nyaso aliuliza.

“Nimekwambia kuwa mimi ni shabiki wa siasa. Madhumuni ya shabiki wa kitu chochote siyo kupata faida ya mali, bali kufanya mioyo yao ifurahi”.

“Lakini wewe huelekei kuwa mtu wa kushabikia kitu hivi hivi tu”.

“Sijui sasa”, Willy alijibu kisha akaendelea. “Mimi nilifikiri unafanya kazi Nyoka Tours and Safaris maana kabla hujavamiwa na yule jambazi nilikuona unatoka kwenye ofisi zao”.

“Hapana, mwenye kampuni hiyo ndiye bwana yangu”, Nyaso alijibu huku akiangalia chini.

Willy alisikia damu inamsisimka.

“Una maana ya F.K au Chris?”, Willy aliuliza.

“Ni nani katika nchi hii ambaye hamjui F.K? Yule ni mtu maarufu sana”.

“Basi, ni huyo F.K”.

“Hongera, Nyaso kwani kwa mara ya kwanza nimeona msichana wa Kiafrika ambaye ni binti wa mvulana wa Kihindi kiwaziwazi bila kujificha”.

“Nimekwambia Willy dunia inageuka.

Willy aliisifu tena nyota yake, kwani kama kweli msichana huyu alikuwa bibi yake F.K, basi bila shaka alimfahamu sana Chris Tondo. Ilikuwa ni bahati kwamba Willy, kama alivyofikiri, angejua mengi kutoka kwa Nyaso.

“Bahati yangu mbaya. Mimi nilifikiri nimepata mchumba kumbe wameisha niwahi”, Willy alinung’unika.

Nyaso alimwangalia Willy na kumhusudu. Alifikiri ingekuwa furaha iliyoje kama angeolewa na kijana mzuri kama yule. Akimlinganisha Willy na F.K, Nyaso alijilaumu. Alijua alikuwa anaishi na F.K kwa sababu ni yeye tu amabaye aliweza kumtimizia mahitaji yake kipesa, hakuwa na mapenzi yoyote juu ya F.K. Lakini sasa matayarisho ya mpango wake yalikuwa yanakaribia kukamilika. Nyaso alikuwa na nyumba tayari. Alikuwa na gari na pesa pia. Hivyo angeweza kuanza opereshani wakati wowote. Alipofikiri hayo, Nyaso alijisikia machozi yanamlengalenga.

“Nini sasa, dada umekuwa nini?”, Willy aliuliza alipomwona msichana huyu akitokwa na chozi la hudhuni. Na ilikuwa ajabu kwamba Nyaso alipotokwa na machozi ndiyo alivyozidi kupendeza.

“Usijali, kila mtu huwa na matatizo yake. Nimekumbuka jambo ambalo limenigusa moyoni, lakini siyo kutokana na wewe”.

“Basi, pole”.

“Ahsante”.

Kutokana na uzoefu wake wa siku nyingi kuhusu wasichana, Willy aligudua kwamba Nyaso hakuwa na furaha katika uhusiano wake na bwana yake. Hivyo aliamua kutumia nafasi hiyo ili aweze kujua mengi zaidi juu ya Chris Tondo na F.K.

“Wewe na F.K mnakaa pamoja”, Willy aliuliza.

“Hapana”.

“Wewe unakaa wapi?”.

“F.K alininunulia nyumba huko Kijenge, na yeye anaishi kwenye jumba lake huko Themi Hill”.

“Anasubiri nini asikuoe msichana mrembo hivi. Anafikiri watu wengine hawakuoni?”, Willy alimtolea Nyaso tabasamu la kumlainisha.

“Hiyo ni shauri yake”.

“Au ni kwamba wazazi wako hawataki wewe uolewe na Mhindi?”, Willy aliongeza. Mara aliona machozi yanamlengalenga Nyaso mara ya pili.

“Hapana”, Nyaso alijibu.

Willy alihisi wazo fulani lilimjia akilini mwake.

“Nyaso, wazazi wako wako wapi?”.

Nyaso hakumjibu Willy. Wote wawili walikaa kimya kwa muda mpaka nyama ilipoletwa.

“Basi, sahau yote hayo unayofikiria ili tule nyama na kufurahi”, Willy alimshauri Nyaso.

“Uliniambia jina lako ni Willy nani?”, Nyaso aliuliza kwa unyonge.

“Willy Gamba”.

“Nimewahi kusikia jina kama hilo mahali fulani”, Nyaso alisema.

“Kama siyo redioni, basi ni kwenye magazeti”.

“Sijui, labda ni mtu mwingine. Kama ujuavyo, baadhi ya watu wanayo majina yanayofanana”.

“Willy sijui nianzie wapi”, Nyaso alisema halafu akasita.

“Naona kama kuna kitu kinakukera rohoni”, Willy alisema. “Nakushauri ukiseme tu. Mimi ni kijana mwenzako. Unajua Nyaso, kama kuna jambo linalokukera moyoni, dawa ya kuleta nafuu ni kumwambia mtu. Ni vizuri zaidi ukamwambia mtu kama mimi ambaye hatufahamiani. Hivyo itasaidia sana kwani huwezi kuwa na wasiwasi kwamba nitawaambia watu wengine. Mimi sijui marafiki zako na wewe hujui marafiki zangu”.

“Willy, nitakupa siri yangu ya maisha ambayo hakuna mtu mwingine anayeijua isipokuwa mimi mwenyewe. Pamoja na mwito wako wa kutaka nikueleze, huenda nisingekueleza. Lakini kwa kuwa wakati wa kutekeleza mpango umekaribia, nitakueleza tangu mwanzo.

Mara mhudumu alifika kwenye meza yao.

“Nyama ya hapa ni safi sana”, Willy alinena.

“Ndiyo sababu ilinifanya nikulete hapa hapa”, Nyaso alidakia.

“Msee, hapa nyama ni safi kabisa kabisa”, mhudumu aliongeza.

“Wewe ni Mchagga?”, Willy aliuliza.

“Ndiyo”.

“Biashara kweli mnaijua”, Willy alimsifia.

“Utafanya nini, babangu?”, mhudumu aliitikia halafu akaondoka zake.

“Hebu endelea”, Willy alimkumbusha Nyaso.

“Mimi nilizaliwa miaka ishirini na sita iliyopita nikiwa ni mtoto wa tatu wa Dk. Soni”, Nyaso aliendelea. Baba yangu alikuwa daktari wa mifugo na mama yangu alikuwa muuguzi. Miaka saba baada ya mimi kuzaliwa tulivamia na majambazi wakati wa usiku, huko nyumbani Moshi. Majambazi hayo yalivunja nyumba na kuua watu wote wa familia yangu isipokuwa mimi tu. Mtumishi wetu wa nyumbani, akiwemo mlinzi wetu waliuawa pia. Hata mimi nilidhaniwa kuwa niliuawa. Majambazo yalipompiga mapanga dada yangu mkubwa aliniangukia na sote wawili tulianguka chini. Majambazi walifikiri kuwa nami nilikuwa tayari nimekufa”.

Aliposema hayo, Nyaso alinyamaza kidogo huku machozi yakimtoka.

Willy ambaye alikuwa akimsikiliza Nyaso kwa makini na mshangao alimshauri asilie.

“Unajuwa kuwa hapa tuko hadharani, hivyo nakuomba usilie”.

“Sawa”, Nyaso alijibu, halafu akaendelea. “Walipoamini kuwa wameua kila mtu, ndipo alipotokea yule mtu ambaye alikua amekodi majambazi. Lengo lake lilikuwa kuhakikisha kwamba kazi aliyowatuma ilikuwa imetekelezwa ndipo awalipe ujira wao. Mtu huyo nilimwona na kumtambua. Halafu nafikiri nilizirai, kwani nilipopata fahamu nilijikuta hospitali huku nimezungukwa na wauguzi pamoja na askari polisi. Baada ya siku mbili niliruhusiwa kutoka hospitali. Nilichukuliwa na polisi kisha niliulizwa maswali mengi. Ni ajabu kwamba sikuweza kukumbuka jambo lolote. Mwisho wake waliniachia kisha nikachukuliwa na Masista wa madhehebu ya Kikatoliki. Wao ndio walionitunza na kunipekeka shule hadi nilipomaliza kidato cha sita”.

Nyaso alinyamaza ili kumeza mate ya kulainisha koo.

“Ulisema huyo mtu ulimwona na kumtambua, lakini ulipopata fahamu ukawa hospitali hukuwa na kumbukumbu tena?”, Willy aliuliza.

“Ndiyo, lakini hebu nikwambie jambo nililotaka ulisikie: Kwa sababu hiyo, mimi sina baba wala mama, sina hata ndugu yeyote. Ndugu wa pande mbili za wazazi wangu walikaa kimya. Hakuna hata mmoja wao aliyejitokeza kunichukua kutoka kwa masista ili anitunze. Ufahamu Willy kwamba mimi nilikuwa mdogo hivyo sikujua mambo mengi. Ndio sababu naitwa Nyaso tu, basi!”.

Nyaso alinyamza kidogo na kisha akaendelea. “Maisha yangu ya utoto yalikuwa ya ukiwa ingawaje wafadhili wangu walinipa kila kitu nilichohitaji. Sasa jambo la ajabu ni kwamba, nilipokuwa nasoma Kidato cha Sita, wanafunzi wa shule ya sekondari ya Kibosho tulipatwa na ajali. Baada ya kumaliza muhula wa kwanza shule ilifungwa. Tulikodishiwa gari litupeleke mjini Moshi tayari kwa safari ya kwenda likizo. Lakini humo njiani, kabla ya kufika mjini, gari lilipinduka. Mimi nilikuwa mmoja wa wanafunzi waliopata majeraha kichwani, hivyo nikalazwa K.C.M.C. Nilipokuwa nimelazwa niliota ndoto kuhusu siku ile ya mauaji ya familia yetu. Ndoto hiyo ilinionyesha mambo yote yaliyokuwa yametokea siku hiyo; mpaka mtu yule aliyekodi majambazi yaliyoteketeza familia yangu. Niligutuka toka usingizini na kujikuta nimezungukwa na madaktari na huku jasho likinitoka mwili mzima”.

“Nilipoulizwa na madaktari nilikuwa najisikia vipi, niliwajibu kuwa nilikuwa najisikia salama wote walishangaa! Hapo hapo muuguzi mmoja alinieleza kwamba wakati nikiwa usingizini nilikuwa napiga kelele na kuhangaika. Alisema kwamba hata wao walikuwa na wasiwasi kuwa huenda nilikuwa karibu kukata roho”.

“Ina maana njozi ile njozi hiyo ilikufanya umkumbuke yule mtu aliyekodi majambazi”, Willy aliuliza kwa shauku kubwa.

“Ndiyo, na siku hiyo hiyo niliruhusiwa nikatoka hospitali nikiwa mzima kabisa. Mtu yule nilikuwa namfahamu tangu nikiwa mtoto, kwanza alikuwa rafiki yake marehemu baba yangu”, Nyaso alisema na kuanza kulia tena.

“Jikaze ili uweze kunimalizia kisa hiki”, alidakia Willy.

“Je, ukimwona sasa unaweza kumtambua”.

“Ndiyo, kwani mara nilipotoka usingizini nilimkubuka barabara. Zaidi ya hayo, mtu huyo anaishi hapa hapa Arusha na ni mtu mkubwa sana. Wakati huo nilipata wazo la kwenda polisi kueleza kisa hicho, lakini nilijuwa hakuna hata mtu mmoja ambaye angeniamini. Kwanza miaka mingi ilikuwa imepita, na pili, mtu huyo alikuwa tayari kizito. Watu wangefikiri mimi nimekuwa kichaa kwa sababu ya ajali”.

“Wewe uliamua kufanya nini”, Willy aliuliza.

“Nilifikiri sana juu ya hali hii, halafu nikaamua kulipiza kisasi”.

“Niliamua kuchukua hatua mimi mwenyewe, kwani Serikali ilishindwa kuwakamata na kuwaadhibu wauaji hao. Niliona ni bora kuendelea na masomo kwanza, kitu ambacho nimefanya mpaka nikahitimu elimu ya Chuo Kikuu. Baada ya masomo niliwaomba ruhusa masista ambao walinitunza ili niweze kufanya kazi serikalini. Waliniruhusu na kunitakia kila la heri. Lakini mpaka sasa huwa ninakwenda kuwajulia hali kwa sababu nawaona kama wazazi wangu. Unaelewa, wakati nikiwa shuleni nilikuwa naitwa Nyaso wa masista”.

“Sasa wewe umeamua kulipiza kisasi kwa njia gani?”, Willy aliendelea kuuliza.

“Usiniulize swali hilo. Tangu nimeota ndoto ile sasa yapata miaka minane. Kwa muda huo nilikuwa nikipanga na kupangua. Sasa naamini nimefikia uamzi sahihi juu ya namna gani nitalipiza kisasi. Jukumu hili ni langu mwenyewe. Willy. Najua nitafanya nini. Kulipiza kisasi ni lazima”.

“Nilipohitimu masomo ya Chuo Kikuu nilipangwa kufanya kazi katika Wizara ya Uchumi na Mipango. Niliomba kituo changu cha kazi kiwe Arusha, kwani hapo ndipo alipo mbaya wangu”.

“Je, mtu huyo anajuwa kuwa wewe ni mtoto wa Dk. Soni?”.

“Hapana. Hawezi kujua kwa sababu mimi situmii jina hilo. Najulikana kama Nyaso wa masista, basi. Na hii imeweza kunisaidia sana, kwani huyu mtu naonana naye mara nyingi, lakini hawezi kunitambua. Yeye ni mtu maarufu hapa, hivyo ni rafiki wa watu maarufu kama akina F.K”.

“Ahaa, kwa hiyo urafiki wako na F.K una uhusiano na mtu huyo?”.

“Siyo hivyo. Urafiki wangu na F.K ulitokana na sababu tofauti kidogo”.

“Kuhusu mpango wangu wa kulipiza kisasi, mimi nilihitaji uwezo mkubwa kipesa. Ilinibidi nifanye kila liwezekanalo ili nipate mtu anayeweza kunipa uwezo huo. F.K ndiye aliyeonekana kuwa mtu wa kukidhi haja yangu. Hivyo nilitupa ndoano yangu, na F.K akanasa. Kwa hiyo lengo langu limetimizwa; fedha za kuendeshea operesheni yangu sasa ninazo. Ninaweza kuanza pole pole kutekeleza mpango wangu. Sasa najisikia nafuu kwani nimemweleza mtu historia yangu”.

Willy alimwangalia Nyaso kwa makini na mshangao vilevile. Mara alikumbuka maneno aliyoambiwa na mama yake mzazi: Mwanangu Willy kila mara jihadhari na wasichana warembo kwani wana mambo.

“Lo, kumbe Nyaso umeishi maisha ya taabu sana, lakini napenda nikushauri kuwa siyo vizuri kulipiza kisasi kwani matokeo yake yanaweza kuwa mabaya zaidi; janga linazua janga. Hivyo ninaku….”.

“Ngoja ngoja, Willy”, Nyaso alimkata kilimilimi. “Mahali nilikofikia siyo pa kurudi nyuma. Janga gani linaweza kunitokea mimi zaidi ya kufa? Mie siogopi kufa. Unajua kwa nini familia yangu ilipouawa Mungu alininusuru? Alifanya hivyo ili niweze kulipiza damu ya familia yangu ambayo ilimwagika bila makosa”.

“Je, unajua kwanini mtu huyu alipanga familia yako iangamizwe?”.

“Ndiyo, najua lakini siwezi kukwambia. Nimekwambia mambo mengi ambayo nafikiri yanakutosha. Najua wasiwasi wako unatokana na kuwaza kwamba nikauawa pia. Mimi niko tayari kufa ili niungane na familia yangu huko peponi. Kula nyama uondoke wala usiniangalie kwa masikitiko hivyo”.

Pale pale Willy alijuwa kuwa Nyaso alikuwa amepania kutekeleza matakwa yake. Lakini alimsikitikia sana msichana yule kwani alijua kwamba alikuwa mgeni katika mambo kama hayo. Hivyo alijua kwa vyovyote Nyaso angekuwa na mwisho mbaya, hata kama mipango yake ilikuwa mizuri. Hata hivyo Willy alimwona Nyaso alikuwa msichana jasiri na kwa sababu hiyo alimheshimu sana. Kutokana na hali hiyo, Willy aliamua kumpasha mambo ambayo yangemfanya msichana huyu awe tayari kusaidiana naye, hasa kuhusu Chris Tondo na F.K.

“Sikiliza Nyaso”, Willy alisema. “Tangu nilipokuona mara ya kwanza nilijua wewe ni mtu wa aina gani. Wewe ni msichana mwenye sura nzuri sana. Ninathubutu kusema umependelewa sana jinsi ulivyoumbika. Vile vile wewe una akili nyingi sana na usafiri kinyume cha wasichana wengi. Unao uwezo wa kumdu mapambano”.

“Hebu wacha kunipamba na sifa nyingi”. Nyaso alimkatiza. “Mimi nimeshasikia nikipewa sifa za kila aina”.

“Sikiliza, Nyaso. Sifa ambazo umezisikia ni kutoka kwa wanaume walaghai wenye kukutaka mapenzi. Nia yangu siyo hiyo, la hasha. Kama hali ya mapenzi ikitokea kati yangu na wewe, basi itakuwa katika hali ya kawaida na siyo kwa kughilibu. Kitu ninachotaka kusema ni kwamba nilikuwa sijaona msichana aliyebarikiwa kama wewe mpaka akawa na akili nyingi, sura nzuri isiyoelezeka na pia hekima na ujasiri. Kwa sababu ya yote hayo. nimekuheshimu. Ndiyo sababu nami nimeamua kukueleza juu ya maisha yangu mwenyewe na kwanini niko hapa”.

Willy alimtolea Nyaso jicho la mahaba.

“Usiniangalie hivyo na kuniumiza roho”, Nyaso alilalamika. “Sema tu unavyotaka kusema”.

“Kama nilivyokwambia hapo awali”, Willy alisema. “Mimi naitwa Willy Gamba. Watu wengi wananijua kama mfanyabiashara. Lakini ukweli ni kwamba mimi ni mpelelezi katika Idara ya Upelelezi Tanzania”.

“Kweli”, Willy alimthibitishia.

“Nimewahi kusikia tetesi kama hizo”, Nyaso alidakia. “Ndiyo sababu nikakwambia nimewahi kusikia jina lako. Lakini watu wengine husema kuwa habari zote kuhusu jina hilo huwa ni hadithi tu na wala hakuna mtu wa namna hiyo ambaye anaishi hapa duniani. Lakini tangu nilipokuona kwa mara ya kwanza, niliona vitendo vyako vinafafana na vile vya huyo Willy anayesifika. Sasa naamini kwamba ni wewe hasa. Nafikiri ninayo bahati kubwa kukufahamu. Sina shaka wewe utakuwa mwali wangu katika operesheni ninayotarajia kuendesha ili kullipiza kisasi”.

“Usijali, ngoja kwanza nikueleze kilichonileta hapa”, Willy alimwambia Nyaso. “Baadaye utaona kwamba mambo mengine pamoja na hayo ya kwako ni kama mchezo”.

“Sawa, Willy, ninakusikiliza”.

“Basi tega masikio nikueleze toka mwanzo hadi mwisho”.

Willy alimweleza Nyaso yote yaliyokuwa yametokea, kwanini alikuwa Arusha na tuhuma zake dhidi ya Chris Tondo na huenda F.K vile vile.

“Kwa hiyo Nyaso”, Willy alimaliza. “Ninakuomba unisaidie kwa kunipa habari ambazo zinaweza kunisaidia katika mapambano dhidi ya majasusi wa Afrika Kusini. Ushindi wetu ni wako vile vile”.

Nyaso aliyekuwa anamsikiliza Willy kwa makini, alimtolea tabasamu la mwaka kisha akasema. “Usiwe na wasiwasi, Willy. Mtu kama wewe ndiye nilikuwa natafuta tokea siku nyingi. Tangu sasa hivi mimi niko mikononi mwako. Msaada wowote utakaohitaji kutoka kwangu hesabu kuwa umepata”.

Willy alijisikia joto la mwili likipanda, lakini akaamua kutoruhusu hali hiyo iendelee mpaka hapo kazi iliyokuwa mbele yao itakapokuwa imemalizika.

“Nyaso”, Willy alisema. “Ninakuomba unieleze yote kuhusu maisha ya F.K pamoja na shughuli zake kibiashara. Yale yanayohusu maisha yenu kama bibi na bwana unaweza kuyaacha”.

Nyaso alimweleza Willy yote anayojuwa kuhusu F.K., Chris Tondo pamoja na shughuli za Nyoka Tours and Safaris.

“Kama unahisi hapa majasusi wamejificha mahali, basi ni nyumbani kwa F.K”, Nyaso alisema. “Kama nilivyokueleza mimi na F.K tumekuwa marafiki kwa muda mrefu. Lakini nimefika nyumbani kwake mara chache. Nyumba yenyewe imejengwa kinamna, kwani White House ni Wihite house hasa. Ni kama Ikulu; hata sijui unaweza vipi kuingia ndani ya jumba hilo”.

“Je, F.K hajawahi kukueleza kitu chochote ambacho kinaweza kunisaidia kuingia ndani ya jumba hilo?”.

“Kitu ninachokumbuka ni kwamba, wakati penzi letu lilipokuwa bado moto moto, F.K alinichukua ili nikalale kwake. Hii ilikuwa moja ya safari tatu tu ambazo nimewahi kulala kwake. Wakati tulipokuwa tunazungumza, nilionyesha wasiwasi wangu kuhusu yeye kuishi peke yake katika jumba kubwa vile. Nilimweleza kuwa angeweza kushambuliwa na majambazi kwani alijulikana kuwa ni mtu tajiri sana. Lakini yeye alinihakikishia nisiwe na wasiwasi kwani jumba lake lilikuwa limejengwa kwa namna yake. Aliongeza kusema kuwa kama angevamiwa, angweza kutumia njia za siri ambazo ziko chini kwa chini mpaka akatokea nje ya seng’enge, ili akawajulishe polisi. Kwanza nilifikiri alikuwa anajigamba tu. Unajuwa wanaume wengi hupendelea kujionyesha mbele ya wanawake kwamba wao ndio wenyewe. Lakini baada ya kusikia tuhuma dhidi yake, naamini alikuwa anasema kweli”.

“Sehemu yake ina eneo gani?”, Willy aliuliza.

“Ekari kumi na mbili”, Nyaso alijibu.

Willy aliangalia saa yake na kuona ilikuwa saa mbini na nusu usiku.

“Nyaso”, Willy aliomba. “Hebu twende ukanionyeshe kwa Chris Tondo. Ningependa nizungumze naye kidogo”.

“Sawa Willy, lakini huenda tusitumie gari langu kwani linajulikana sana. Hapo nyumbani kwangu kuna gari la rafiki yangu kutoka Nairobi, aliliacha pale halafu alipanda ndege kwenye Dar es Salaam. Heri tukatumie gari hilo”.

“Mawazo yako ni sahihi. Je, lina namba za Kenya?”.

“Ndio”.

“Haya twende. Si wewe mwenyewe unataka pilika pilika? Sasa basi zimeanza”, Willy alimtania Nyaso.

Waliunuka toka vitini na kuondoka.

Chris Tondo alikuwa anaishi sehemu inayojulikana kama ‘Corridor Area! Wakati Willy na Nyaso walikuwa wanaelekea huko kupitia barabara ya Haile Sellasie, walipishana gari dogo aina ya Datsun.

“Gari hilo ni la F.K. na anaendesha mwenyewe. Kwa kawaida huwa haliendeshi gari hilo. Mara nyingi huwaachia watumishi wake na yeye anatumia ile Benz yake, kwani anazo gari tatu hapo nyumbani kweke”, Nyaso alimwambia Willy mara walipopishana na ile Datsun.

F.K. alikuwa hakuwatambua.

“Huenda amechoka kuendesha magari makubwa”, Willy alisema.

“Nyumba ya Chris Tondo ni ya nne kutoka nyumba hiyo hapo”.

“Basi, egesha mahali pazuri na mimi nitatoka kwa muda wa robo saa”, Willy alimwambia Nyaso.

“Mimi nitaingia katika nyumba hii kumwona rafiki yangu”, Nyaso alisema “Nitatoka baada ya robo saa ambapo wewe pia utakuwa tayari. Tafadhali Willy, kama watu hawa ni hivyo unavyohisi, basi ni watu wabaya, ni vizuri kuchukua tahadhari wasije wakakudhuru”.

“Usijali, tutaonana baada ya dakika hizo”, Willy alisema huku akitokomea gizani.

Nyaso aliyekuwa anamwangalia Willy huku akimwemwesa alijikuta anajisemea kimoyomoyo. “Jinsi nilivyomzoea! Utafikiri tumeishi naye miaka mingi. Hivi sasa ninavyojisikia ovyo kumkosa hiyo robo saa”.

Nyaso aliondoka akaenda kubisha hodi mlangoni kwa rafiki yake.

Willy aliambaa kwenye nyufa za nyumba jirani na ile ya Chris Tondo. Aliwaona vijana wawili kwa mbali wakipotea kwenye giza la michongoma ya nyumba iliyotazamana na ile ya Chris Tondo. Mara alitambua wale walikuwa vijana wa Hamisi. Kwa kuwa hakutaka wamwone, Willy alijipeneyza kwenye sehemu ya kushoto ya ua. Kwa ustadi kama wa paka Willy alipanda ukuta na kudondoka uwani bila kishindo.

Aliangaza huku na kule na kwa bahati nzuri aliona dirisha kwa upande huo liko wazi. Aliona taa ilikuwa inawaka kwenye chumba upande wa sebule. Willy alihisi kilikuwa chumba cha kulala cha Chris. Basi alijinyanyua, akakwea hadi ndani ya nyumba kupitia dirishani. Huku bastola ikiwa mkononi mwake. Willy alijikuta kadondoka bafuni. Alipofungua mlango taratibu alijikuta yuko kwenye njia nyembamba iliyokuwa inatenganisha vyumba. Aliamua kwenda sebuleni ambako alihisi Chris angekuwepo.

Willy alifungua mlango kwa ghafla ili asimpe nafasi Chris ya kuwa tayari kujihami. Lakini alishangaa kukuta chumba kile kilikuwa kitupu. Taa ya mle chumbani ilikuwa inawaka na Willy aliona jinsi chumba kile kilivyokuwa cha fahari isiyo kifani. Alijongea na kuelekea kwenye chumba kingine ambacho kilikuwa kinawaka taa pia. Hata hivyo, Willy alishangazwa na ukimya uliokuwa ndani ya jumba hilo.

Alifikiri labda walipopishana na gari la F.K. Nyaso alikuwa hakuona vizuri kwani huenda hata Chris alikuwa kwenye gari lile lile. Wakati anafikiri yote hayo, aliamua kuendelea na mpango wake. Kwa kasi kama umeme Willy alifungua mlango wa chumba hicho. Kumbe loo mle ndani alikuta maiti tatu! Baada ya kuangalia vizuri aligundua kuwa watu watatu hao waliuawa kwa kupigwa risasi. Walikuwa ni Chris Tondo, msichana mmoja mrembo sana ambaye Willy alihisi kuwa alikuwa binti yake Chris pamoja na mlinzi mmoja kutokana na mavazi yake..

“Bila shaka kazi hii ni ya F.K.; ameniwahi”, Willy alijisemea kwa uchungu.

Bila kupoteza muda, alitoka nje kwa kupitia njia aliyokuwa ameingilia. Alipokuwa nje alimwona Nyaso naye anatokea kwenye lango la nyumba ya rafiki yake, walipoingia ndani ya gari, Willy alimwambia Nyaso.

“Hebu endesha gari haraka ili tutoke kwenye sehemu hii. Chris, mlinzi wake pamoja na binti yake wameuawa. Nipeleke hotelini kwangu kwani sasa kazi imeanza”, Willy alimwambia Nyaso.

“Huyo ni F.K. Willy, ndiyo sababu tulikutana naye akitoka huku”, Nyaso alisema.

“Bila shaka”, Willy alikubaliana na Nyaso.

“Masikini Betty kauawa bure mtoto wa watu. Mimi ndiye niliyemfahamisha kwa Chris, oh Betty! Willy uliyohisi ni kweli. F.K. utakiona “, Nyaso alisema kwa uchungu. Aliendesha kuelekea New Arusha Hoteli. Willy alipoangalia saa ilikuwa saa tatu na robo. Alikuwa amechelewa robo saa lakini alikuwa amejua mengi.

KABLA YA USIKU WA MANANE

Wakati Willy na Nyaso walipokuwa wanaelekea New Arusha Hoteli. F.K. alikuwa amewasili nyumbani kwake. Alikuwa akiwaeleza wenzake kazi aliyokuwa ameifanya.

“Kazi mliyonituma nimeimaliza tayari”, F.K alisema.

“Vema”, George alijibu.

“Sasa ni saa tatu na dakika kumi, mipango yetu itaanza saa ngapi?”, P.G aliuliza.

“Hebu nisikilize kwa makini”, George alieleza. “Nilikuwa kwenye chumba cha habari na nimewasiliana na Kamanda wa KULFUT huko Afrika ya Kusini. Nilipompa habari kuwa tayari tumepoteza watu wawili alikasirika sana na kuniambia kwamba asingependa kusikia kitu kama kile tena. Alisema jambo hilo lilikuwa kinyume cha nia ya matakwa ya Serikali ya Afrika Kusini ambayo ni kuleta ‘hofu’ isiyoelezeka dhidi ya wapigania uhuru, nchi zilizokuwa mstari wa mbele na Afrika huru kwa ujumla.

“Ameongeza kuwa usiku wa leo lazima uwe usiku wa kazi. Hapo kesho Kamanda anataka kusikia habari za kilio kutoka Tanzania na Afrika nzima. Kama mjuavyo mkutano wa wapigania uhuru umepangwa kuanza kesho saa tatu. Lakini amri tuliyopewa ni kwamba mkutano huo usiwepo, na badala yake kuwe na vilio. Wale watakaokuwa wamesalimika watakuwa wanaikimbia Tanzania bila mpangilio wowote. Wakati dunia nzima itakapokuwa inalaani kipigo tutakachokitoa kwa Tanzania, majeshi yetu ya Serikali ya Afrika Kusini yatavamia Msumbiji, Botswana, Zambia, Zimbabwe na Angola hapo kesho. Watu wa nchi hizo watabaki wamechanganyikiwa. Wakati dunia nzima inagwaya, jeshi letu la polisi litafyekelea mbali watu weusi wenye kuleta ghasia ndani ya Afrika Kusini. Tutawachinja kama kuku na hivyo kuzima kabisa maasi wanayoita ukombozi”.

“Ndio mnaona umuhimu wa kushinda katika mapambano yetu. Kamanda wetu amenipa majina ya viongozi wanne wa wapigania uhuru. Ameongeza kwamba hao wakiuawa wote kwa siku moja, itakuwa ni kipigo cha kutosha hata kuzima vugu vugu la maasi katika Afrika kwa muda mrefu. Majina ya viongozi hao ni Mbeki, Jamana, Ntamazi na Basweka. Je, F.K una habari kuwa watu hawa wamewasili?”.

“Ndiyo, wote hawa wamefikia Maunt Meru Hoteli na namba za vyumba vyao ni hizi hapa”, F.K alisema huku akimpa kijikaratasi chenye maelezo kamili juu ya viongozi wake.

“Umefanya kazi nzuri, F.K”, George alimpongeza F.K.

“Ahsante, kazi nzuri lazima ifanyike George ili lengo letu liweze kutimizwa”, F.K alisema.

“Sina shaka”, George alisema. “Viongozi hawa wanalindwa sana. Askari polisi, maafisa usalama na hao wapelelezi mashuhuri watatu wamewazunguka viongozi hao, hasa kutokana na mambo yaliyotokea jana. Tumshukuru F.K kwa kuhakikisha usalama wetu na kukaa bila adui kujua tuko wapi huku tukipata habari bila matatizo”.

“Hayo yote ni matunda ya mafunzo yako thabiti, kama Mwalimu wangu”, F.K alijibu kwa unyenyekevu.

“Hivyo”, George alieleza. “Mpango ni kama ifuatavyo; kwanza kabila lazima tuwakorofishe hawa wapelelezi watatu. Bila kufanya hivyo, kazi yetu ya kuwafyekelea mbali viongozi hawa itakuwa ngumu. Kwa hiyo, mimi nimepanga kwamba ni lazima Willy Gamba auawe leo kabla ya usiku wa manane, inaonekana huyu ndiye ngao ya wengine waliobaki. Yeye akiuawa wenzake watabaki wamegwaya na kuchanganyikiwa wasijue la kufanya. Hawataweza kuchukua hatua yoyote kwa leo kwani watahitaji muda mrefu kutayarisha mpango mpya, bila kuwa na Willy Gamba. Hii itatupatia muda sisi kufunga kazi, Kabla ya jua kuchomoza, kazi yetu itakuwa imekamilika”.

“Mtu huyu atauawa vipi”, P.G aliuliza.

“Mpango wa kumuua Willy utakuwa kama ifuatavyo, F.K na vijana watatu watakwenda nyumbani kwa mzee Hamisi. F.K alieleza kwamba familia ya mzee Hamisi iko likizo, hivyo yeye anakaa peke yake kwa wakati huu. Vile vile tunafahamu kuwa Willy na mzee Hamisi wanafanya kazi bega kwa bega, kwani habari zote kutoka kwa bosi wa Willy zinapitia ofisini kwa mzee Hamisi. Hivyo F.K na wenzake watamlazimisha mzee Hamisi amwite Willy Gamba kwa simu toka hapo hotelini kwake. Mzee Hamisi atalazimishwa kumwambia Willy aje nyumbani kwake ili ampe habari muhimu sana kutoka kwa bosi wake. Bila shaka Willy atakuja na mtego wetu utamnasa. Atauawa tu”, George alisema huku akitabasamu alipoona nyusa za wenzake zimejaa furaha baada ya kusikia mpango wake.

“Kweli naamini unastahili kuwa kiongozi wetu”, Dave alisema. “Kwenye mtego kama huu hata mimi ningenasa tu”.

“Lakini vijana watatu hawatoshi, mtu huyu ni mbaya sana”, F.K alisema kwa sauti ya woga.

“Oke, nitakwenda nao mimi mwenyewe”, Dave alijigamba.

“Hapana”, George aliingilia kati. “F.K atakwenda na hao vijana, bali tu tutamwongeza mmoja zaidi ili wawe wanne. Wewe mwenyewe Dave unajuwa kwamba vijana wetu wanao ujuzi mkubwa. Vile vile mfahamu kuwa wakati Willy akiitwa kwa mzee Hamisi hatachukua tahadhari kubwa, kwani hatahisi kitu chochote kibaya. Hivyo kazi yao itakuwa rahisi kama mtelemko. Mara tu baada ya mzee Hamisi kumwita Willy, naye lazima auawe. Baada kumuua Willy vijana wetu watarudi huku haraka kwa kazi nyingine ya baada ya usiku wa manane. Mimi, P.G na vijana wawili tutakwenda kukagua mazingira Maunt Meru Hoteli na vile vile jumba la Kimataifa ambamo mkutano unatarajiwa kufanyika. Tunataka kutega mabomu ya masaa kwenye sehemu hiyo. “Kwa hiyo F.K, baada ya kumwita Willy na kumuua Hamisi, kazi nyingine utawaachia vijana. Wewe utachukua gari la Hamisi kwani litahakikisha usalama zaidi, halafu utufuate Maunt Meru Hoteli ili utuonyeshe chumba cha mikutano ambamo tunatarajia kutega mabomu. Baada ya kumuua Willy. Vijana warudi huku haraka kwa gari lako. Wewe Dave utabaki hapa na vijana watatu mkisubiri kazi yenyewe ya usiku wa manane. Mipango zaidi nitawajulisha saa tano usiku wakati tukijitayarisha kwenda kwenye mapambano yenyewe. Naamini nyote mmenielewa?”.

“Mpango ni barabara kabisa”, Dave alisema huku akijinyoosha nyoosha.

“Hivi ni kwanini mnataka kutega mabomu? Si hawa watu tutawaangamiza usiku huu ili mkutano usifanyike kesho?”, P.G aliuliza.

“Katika kazi hii hakuna kuacha mwana hata kidogo, kama hatukufanikiwa kuwauwa wote kwa leo, basi wale watakaodiriki kuendelea na mkutano kesho, nao watauawa vile vile”, George alijibu huku akitabasamu.

“Baada ya kufunga kazi sisi tutaondoka vipi hapa?”, Dave aliuliza.

“Usiwe na wasiwasi”, George alijibu. “Mipango yote imeshakamilishwa na F.K; ukipata muda ingia chumba namba kumi”.

“Haya, twende kazini vijana. Mungu atusaidie”, P.G alisema.

“Amin!”, wengine walijibu kwa pamoja huku wakiinuka na kujitayarisha kuondoka.

Ilikuwa yapata muda wa saa tatu na nusu usiku, Willy na Nyaso walibisha hodi kwenye chumba cha Willy baada ya kujua kwamba wenzake walikuwa wanamsubiri ndani. Willy na Nyaso walikuwa wamefika pale chumbani kwa kupitia njia tofauti kama walikuwa hawafahamiani. Willy alikuwa amepanda kwa kutumia ngazi, wakati Nyaso alitumia lifti.

“Nani”, Bon aliita kwa sauti.

“Willy”.

Bon alifungua mlango huku akiwa na bastola mkononi. Alipomuona msichana Bon alirudisha mlango haraka haraka.

“Na wewe woga umezidi, karibu ndani Nyaso”, Willy alimkaribisha huku akirudisha mlango baada ya Nyaso kuingia ndani.

“Maama”, Mike alisema kwa mshangao.

“Nini?”, Willy aliuliza kwa kebehi.

“Wewe huwa unawatoa wapi hawa?”.

“Malaika huyu ama mwanadamu?”, Mike aliendelea kushangaa.

“Wewe unafikiri vipi?”, Willy alimuuliza.

“Malaika”, Mike alijibu huku wote chumbani wakimwemwesa.

“Subiri sasa niwafahamishe kwa huyu ‘malaika’. Mtoto huyu anaitwa Nyaso. Ni Nyaso tu. Msiulize zaidi. Nyaso hawa ndiyo rafiki zangu niliokuwa nikikueleza. Yule maneno mengi ni ‘Kikuyu’ toka Kenya. Huyu ni Bon toka Afrika Kusini na yule pale anayejifanya mkimya ni Rocky kutoka Zimbabwe”, Willy alisema.

“Nashukuru kuwafahamu”, Nyaso alijibu.

“Sisi ndiyo tunapaswa kushukuru kwani kumfahamu mtoto mzuri kama wewe ni fahari ati”, Mike alisema.

“Willy kweli watanzania mnatoa watoto, mimi sina hata maneno. Hivi vijana wa hapa mtaweza kujenga?, Mtoto kama huyu akisema umpe mshahara wako wote wa mwezi unaweza kukataa? La hasha rocky alisema.

“Ahsante kwa sifa ulizonipa”, Nyaso aliitika.

“Sikia sauti yake nyororo”, Bon aliongeza.

“Wacha sauti na sura, Nyaso anayo mengi zaidi”, Willy aliasa.

“Haya Willy, umemleta huyu mrembo ili tukusifu ama unayo mengine zaidi?”. Mike aliuliza.

“Wacha maneno mengi, nyinyi wakenya mkijua kiswahili kadiri, sisi watanzania huwa watufui dafu”, Willy alisema.

“Hayo ndio maendeleo”, Mike aliongeza.

“Hebu jamani, nisikilize kwa makini. Sikuja na msichana huyu ili kuwakoga. Kusema kweli mambo yamepamba moto tayari na ni lazima na sisi tuwemo kazini”, Willy alisema halafu aliwaeleza juu ya mazungumzo yake na Nyaso, juu ya F.K na mwisho jinsi walivyokwenda kwa Chris na kukuta ameuawa.

“Tunao uhakika kuwa F.K ndiye aliyefanya mauaji hayo. Mimi ninahisi amekuwa na wasiwasi baada ya kusikia kwamba mimi nimemhoji sana Chris. Kwa hiyo aliamua kutumia mbinu zile zile za siku zote: Yaani maiti hawana maneno. Hii ina maana kwamba fumbo limefumbuliwa tayari. Majasusi tunaowatafuta wamejificha kwa F,K. Kutokana na maelezo ya Nyaso kuhusu jumba la F.K. lilivyo ni dhahili kwamba majasusi hao wako mle ndani, hivyo kazi imebaki kwetu”, Willy alisema.

“Sasa mipango iko vipi bosi?”, Bon alimwuliza Willy.

“Kwanza kabisa mimi na Nyaso tutakwenda kufanya uchunguzi kwenye jumba la F.K. kama nilivyowaeleza, jumba hilo linazo njia za chini kwa chini. Na kama hivyo ndivyo, basi mle kuna sehemu nyingi ambazi ni za siri. Kwa sababu hiyo mimi naona ni bora niende na Nyaso ambaye atanionyesha mahali jumba hilo lilipo. Baada ya kufanya utafiti, nitarudi hapa ili tujadili jinsi gani ya kuwakabiri hao majasusi usiku huu, ama mnasemaje?”, Willy aliuliza.

“Hisia zetu ni sahihi. Sasa kwa nini sisi sote tusivamie jumba hilo mara moja na kufunga kazi”, Mike alipendekeza.

“Hapana Mike, huenda kazi yenyewe isiwe rahisi kama unavyofikiri. Haitakuwa vizuri sisi sote kujitumbukiza bila kufanya uchunguzi. Uwezekano wa kuangamia sisi sote upo, na hilo litakuwa pigo kubwa kwa Afrika huru na kwa wapigania uhuru wa Afrika Kusini. Hivyo utakuwa ushindi kwa makaburu. Amini usiamini, mapambano yanayoendelea huko Afrika Kusini, kwa kiwango kikubwa, yanategemea ushindi wetu”, Willy alijibu.

“Mimi nakubaliana na wewe kabisa”, Bon alisema halafu akaendelea, “Kusema kweli, vita kamili vimeanza ndani ya Afrika Kusini. Ushindi wetu hapa utawatia hamasa vijana wa kizalendo ambao wanapambana na askari wa makaburu. Nia ya makaburi ni kutuvuruga sisi huku na kufanya wana-ukombozi walio ndani na nje ya Afrika Kusini kuchanganyikiwa. Vita vya Ukombozi tayari vimevuka hatua ya kutumia mawe na marungu. Awamu hii ni ya kutumia silaha za moto. Hivyo, na sisi tuwe tayari kujitoa muhanga ili matunda ya uhuru yapatikane kwa watu wetu”, Bon alisema.

Willy alikuwa karibu kuzungumza jambo fulani, mara simu ililia. Wote waliangaliana halafu Willy aliamua kusikiliza simu.

“Hallo”, Willy aliitikia.

“Mimi ni mzee Hamisi, naomba kuzungumza na Willy”, sauti ya mzee Hamisi ilisikika.

“Mwenyewe nazungumza, habari za saa hizi mzee”, Willy alijibu.

“Habari ni nzuri, Willy nakuhitaji uje hapa nyumbani kwangu haraka kwani nina habari muhimu sana”, Hamisi alisema, Willy alisita kidogo halafu akamjibu.

“Sawa, nakuja”, halafu alikata simu bila kusema maneno zaidi.

“Huyo ni nani?”, Mike aliuliza.

“Ni mzee Hamisi, anasema ni lazima niende nyumbani kwake kwani ana habari muhimu”, Willy alibu.

“Hivi sasa itabidi mimi, Rocky na Nyaso tuandamane mpaka kwenye jumba la F.K. Sisi tutafanya utafiti halafu turudi hapa”, Bon alishauri.

“Hiyo ni sawa, wewe Mike huna budi kubaki hapa. Kama kuna habari zozote, tutawasiliana. Bon na Rocky ni lazima kuchukua tahadhari kubwa kwani katika mazingira ya jumba kama lile, kunaweza kukatokea jambo lolote”, Willy aliasa.

“Huyu Hamisi anakaa wapi?”, Nyaso aliuliza.

“Anakaa kwenye nyumba za maafia huko Kijenge, karibu na barabara iendayo Themi Hill. Kwa hiyo tutaondoka wote halafu nyinyi mtaniacha barabarani. Baada ya kuzungumza na mzee Hamisi, mimi nitatafuta njia yangu mwenyewe ya kurudi ili tukutane hapa tena. Sasa Nyaso, wewe telemka chini na kutusubiri kwenye gari”, Willy alielekeza.

Wote watatu walichukua silaha ambazo walifikiri wangezihitaji. Willy pia, ingawa alikuwa anakwenda kwa mzee Hamisi, alichukua silaha akiwa tayari kwa lolote. Wanaume walishajuwa kwamba walikuwa wanawinda na huku wakiwindwa. Mike ambaye alikuwa na jukumu la kubaki pale hotelini, naye alikaa tayari na silaha zake. Walipokuwa tayari, walielekea kwenye gari huku kila mmoja akitumia njia tofauti na wenzake.

“Ahsante”. F.K. alimwambia mzee Hamisi baada ya kuzungumza na Willy.

“Hebu ondoa huo mtutu wa bunduki kwenye kichwa changu. Unajua mimi ni mzee sana na kuniweka katika hali hii kunaweza kunisababisha nipate ugonjwa wa moyo. Kazi uliyotaka nimekufanyia, zaidi unataka nini”, mzee Hamisi aliuliza.

“Ha ha”, F.K. aliangua kicheko kwa jeuri halafu akaendelea, “Mzee Hamisi sina budi nikushukuru kwa yote uliyonifanyia, maana bila kupata habari ulizonipa mipango yangu isingefikia hatua hii. Wewe ni mtu mwenye ujuzi na uzoefu katika shughuli za usalama. Sina shaka umeshahisi kitu gani kinatendeka baada ya kuona unavamiwa na kundi la Wazungu. Hawa ni askari kutoka Afrika Kusini. Ufahamu fika kwamba wewe ni msaliti wa nchi yako. Hii imetokana na nyinyi watu wenye vyeo Serikalini kupenda pesa. Pesa nilizokupa zilikufanya uisaliti nchi yako. Ha ha! Uchu wa pesa utaimaliza Afrika. Je, unajua adhabu ya usaliti ni nini”, F.K. aliuliza kwa kebehi.

“Usiniue F.K. kwani hata ukiniua, Willy atakumaliza…”, Hamisi alisema huku akipapatika.

“Stumke, fanya kazi yako”, F.K. aliamrisha, mzee Hamisi aliinuka na kabla hajachukua bastola yake kutoka kwenye koti, alipigwa risisa ya paja na kichwani na kufa papo hapo.

“Sasa msubiri Willy. Nina imani kazi yenu itakuwa rahisi”, F.K. alisema huku akimpa Stumke swichi ya gari lake. Stumke alikuwa kiongozi wa yale majasusi yaliyomvamia mzee Hamisi, na ambayo sasa yalikuwa yakimsubiri Willy. Baadaye F.K. alichukua funguo za marehemu Hamisi kutoka mezani kwake na kuaga.

“Stumke, tuonane nyumbani. Lakini nawashauri mkae macho sana. Ingawaje Willy atakuja bila tahadhari, ni mtu hodari kupindukia. Msimpe mwanya bali mtumie mbinu zote mnazozifahamu”, F.K. alionya.

“Usiwe na wasiwas, F.K. mimi nilikwisha ongoza kundi hili hili na kuteketeza kikosi kizima huko Namibia. Itakuwaje tushindwe mtu mmoja?, Huyo mfute kutoka kwenye orodha ya adui walio hai. Labda asitokee!”, Stumke alijigamba.

Willy na wenzake walikuwa wanaingia kwenye barabara kuu iendayo Themi Hill. walipishana na F.K. ambaye alikuwa akiendesha gari la Hamisi na kuelekea mjini. Si F.K. wala Nyaso ambaye alimtambua mwenzake kwani wote walikuwa wanaendesha magari ambayo hayakuwa yao. Lakini Willy aligeuka na kuliangalia gari hilo ambalo lilikuwa linakwenda kasi na kupotea gizani.

Hilo ni kama gari la mzee Hamisi”, Willy alisema baada ya kugutuka.

“Itakuwaje akuite halafu atoke”, Bon aliuliza kwa mshangao.

“Hapo sasa”, Willy aliitikia.

“Kama una hakika ni lenyewe, basi hilo siyo jambo la kawaida”, Rocky alisema.

“Huenda ameona nimechelewa hivyo akaamua anifuate”, Willy alijibu.

“Lakini hatujachelewa hata kidogo”, Rocky alijibu.

Wakati huo walikuwa wamekaribia sehemu ya Kijenge ambako Hamisi alikuwa anakaa.

“Nyaso! Simama hapo pembeni”, Willy alisema, Nyaso alijisikia raha kwani alijua yeye alikuwa msichana peke yake aliyepata fursa ya kuwaendesha wapelelezi mashuhuri wa Afrika, hasa wakiwa katika harakati za mapambano. Alisimamisha gari pembeni mwa barabara na Willy akatelemka.

“Haya nendeni lakini jihadharini sana. Huko mwendako panaweza kuwa moto. Nawatakia kila la kheri”, Willy alisema.

“Ahsante”, Bon na Rocky walijibu kwa pamoja.

Nyaso aliendesha kuelekea Themi Hill baada ya kumwacha Willy. Willy naye taratibu aliambaa kwa kufuata ua wa sehemu hii kuelekea nyumbani kwa Hamisi. Nyumbani kwa marehemu mzee Hamisi Stumke alikuwa amepanga watu wake tayari.

“Mtu huyu akiingia sharti auawe pale pale. Hakuna kusubiri. Yeyote atakayekuwa kwenye sehemu nzuri ya kumuua lazima afanye hivyo mara moja. Kama tulivyokwisha ambiwa, mtu huyu ni hatari sana. Kila mtu awe macho”, Stumke aliwaonya wenzake.

Stumke alitokomea gizani. Aliambaa kwenye ua huku akielekeza macho na mawazo yake kwenye lango la nyumba. Majasusi wengine wawili walikuwa wamejibanza kwenye ua. Mmoja wao mwingine alikaa langoni kwani yeye ndiye ambaye angemfungulia Willy. Kila wakati waliposikia muungurumo wa gari, walijiweka tayari lakini hakuna gari lililojitokeza pale nyumbani. Gari la Nyaso liliposimama Stumke kutokana na uzoefu wa kazi yake, alihisi huenda mtu wao angeweza kuteremshwa njiani na kuingia pale kwa kutembea. Hivyo aliwashauri watu wake wawe macho kama mtu huyo angeingia kwa miguu.

Kengere ya ilani ilizidi kulia kichwani mwa Willy baada ya kila hatua aliyopiga kuelekea kwenye nyumba ya Hamisi. Ilikuwa kawaida yake kwamba kila hali hiyo ilipotokea, Willy alichukua tahadhari ya hali ya juu. Wakati huo huo Willy alimua kupita mlango wa nyuma badala ya mbele ya nyumba ile. Alizunguka ua wa nyumba huku akinyatia kama nyani. Aliruka ua huo wa michongoma na kutua ndani kwa kishindo kidogo.

Jasusi aliyekuwa upande wa kulia aligutuka kidogo halafu akaamua kuja kuangalia kuna nini. Alikuja kwa mwendo wa kunyatia kiasi kwamba hakutoa sauti yoyote. Lakini kwa kuwa masikio ya Willy yalikuwa na uzoefu kama wa mnyama awindwaye porini, aliweza kusikia mtu anajongea. Willy aliinuka mara moja na kujibanza kwenye pembe ya kulia ya nyumba. Aliangalia kwa chati na kuona yule kaburu anasogea huku bastola ikiwa mkononi. Macho ya Willy kama ya wale majasusi yalishazoea giza. Hivyo aliweza kuona vizuri.

ITAENDELEA