Hofu Sehemu ya Tano
IMEANDIKWA NA : ARISTABLUS ELVIS MUSIBA (A.E MUSIBA)
Simulizi : Hofu
Sehemu Ya Kwanza (5)
Willy alikuwa na bastola mkononi, mara akaamua kuirejesha mahali pake, akajitayarisha kumkabiri jasusi yule kwa mikono. Pale pale akijuwa kuwa kuitwa kwake kulikiwa ni mtego na kwa hiyo ilibidi awe tayari kwa mapambano. Yule jasusi alisogea karibu kabisa na pale Willy alipokuwa amejibanza. Willy alimwacha afike kabisa kwenye usawa alipokuwa amesimama. Ndipo alipomrukia na kumkaba koo kiasi kwamba yule jasusi hakuwa na muda wa kuweza hata kukohoa. Willy alivunja shingo ya yule jasusi ambaye alikata roho bila kutoa sauti. Taratibu Willy aliilaza chini maiti yake.
Jasusi mwingine alipoona mwenzake anakawia kurudi, alitoa ishara kwa yule aliyekuwa kwenye lango. Alikuwa anamjulisha kuwa anaelekea nyuma ya nyumba. Wakati huo damu ya Willy ilikuwa tayari imechemka kwa hali ya vita. Mara alimwona jasusi mwingine anakuja mbio. Willy alimsubiri huku akimwemwesa kwani alikuwa anakwenda hovyo bila tahadhari yoyote. Lakini alipokaribia mahari Willy alipokuwa, yule jasusi alisimama kana kwamba alikuwa amegutushwa na jambo fulani. Willy alijua kuwa kama angesubiri, bila shaka angeonekana. Kama risasi, Willy alifyatuka na kumrukia yule jasusi pale alipokuwa amesimama. Alimkata mkono wa karate na kumpasua kichwa. Wote walianguka chini.
Walianguka kwa kishindo ambacho kilimshitua Stumke na yule jasusi aliyekuwa kwenye lango. Wakiwa kama watu waliotiwa ufunguo walikimbia kuelekea mahali alipokuwa, mmoja akipitia kushoto na mwingine akipita kulia. Hapo hapo Willy aligundua kuwa jasusi yule alikuwa kafa, hivyo aliinuka haraka. Aliruka kama nyani na kukamata sehemu ya juu ya ukuta. Alijipinda na kupanda juu ya paa akajibanza. Mara tu baada ya kupanda juu ya paa ya nyumba, Stumke na mwenzake walifika sehemu ambayo Willy alikuwa amesimama muda kitambo. Walikuta wenzao wawili wamekufa. Waliingiwa na woga sana.
“Grande, mtafute haraka tumuue, unasikia”, Stumke alimwamrisha mtu wake wasiwasi mwingi.
“Willy, uko wapi? njoo tuonane uso kwa uso kama kweli wewe ni mwanaume”, Grande alisema kwa sauti. Willy ambaye alikuwa amelala juu ya paa alijisikia raha alipoona majasusi yale yanapaparika kwa woga. Mara aliinuka na kwa spidi kubwa Willy alijirusha katikati yao. Lakini wakati akiwa bado yuko hewani aliipiga teke bastola ambayo Grande alikuwa nayo mkononi. Silaha hiyo ilianguka upande wa pili wa ua. Stumke ambaye alikuwa ameangalia upande mwingine aligeuka na kufyatua risasi. Wakati ule ule Willy alijiviringisha chini na risasi zile zikampata Grande.
“Stumke, umeniua! Aibu”, Grande alilalamika halafu akakata roho pale pale. Willy aliamka na kumwahi Stumke. Aliipiga teke bastola yake ambayo iliruka na kutua juu ya paa ya nyumba. Mara mapambano makali yakaanza.
Stumke alimpiga Willy teke la tumbo ambalo lilimpata barabara na kumwangusha chini. Kabla hajaweza kusimama, Stumke alimwongeza teke jingine la ubavuni. Halafu aliamua kumrukia ili ammalize kabisa. Kumbe Stumke alikuwa amefanya makosa. Wakati huo huo Willy alijiviringisha kidogo na Stumke akamkosa. Willy alijipinda na kusimama. Alikuwa amejisikia damu yake imeanza kwenda mbio kutokana na kupigo. Hasira zilikuwa zimempanda. Angeweza kummaliza Stume pale pale, lakini Willy alimpa nafasi naye ainuke. Jambo hilo lilimshangaza sana Stumke.
“Simama kaburu mshenzi, wee! Ulichokuja kutafuta leo utakipata. Kama mlifikiri mkutano hautafanyika mlijidanganya. Wakati ukiwa jehanamu mkutano utakuwa unaendelea”, Willy alisema kwa hasira.
Stumke alikuwa bingwa wa karate katika jeshi la KULFUT. Hivyo alimsikitikia Willy kwani alifikiri angeweza kumamliza mara moja. Aliamini kwamba hakukuwepo mtu yeyote kutoka katika nchi za Afrika ambaye angediriki kupigana naye. Stumke alikuwa mwoga kila mapambano yalipokuwa sura ya kutumia silaha kama vile bastola. Lakini kama mtu alipambana naye kwa kutumi mbinu za karate, basi Stumke alimhesabu mtu huyo kuwa ni marehemu.
“Utajijutia leo”, Stumke alisema. Mara alimrukia Willy na kutoa mapigo matatu ya karate ambayo hata Willy hakutarajia kamwe. Stumke alishangaa kwani Willy aliyazuia yote. Ni mara chache ambazo Stumke alikuwa ametumia mapigo ya namna hiyo wakati wa mapambano. Na kila alipoyatumia ni watu wachache ambao waliweza kuyazuia. Jambo ambalo alikuwa hajui Willy alikuwa Ninja.
Stumke alibadili mbinu na kutumia zile za hali ya juu kabisa. alitoa pigo la kwanza ambalo Willy alilikwepa. Alitoa pigo na pili na Willy alilizuia. Alipotoa pigo la tatu Willy alimkamata mkono ghafla. Aliukata kwa kiganja chake nao ukavunjika. Hata hivyo Stumke alijirusha na kumpiga Willy teka farasi ambalo lilimwangusha chini. Wakati huo huo Stumke aliguna kutokana na maumivu ya mkono wake uliovunjika. Alimtupita teke la mauti Willy lakini alikuta patupu! Willy alikuwa amejipinda kama swala na kuushika mguu wa Stumke akiwa bado hewani. Aliupinda na kufyatua mfupa wa goti.
Willy alimsukumiza Stumke kwenye ukuta ambapo aligonga kichwa chake na kuona nyota. Fahamu zilimpotea. Willy alimfuata kasi na kumkata karate iliyoacha mkono wake wa pili bila kuwa na kazi. Alimtingisha huku akisubiri fahamu zimrudie. Stumke alipopata fahamu, alijuwa kuwa ameshindwa. Hivyo kama lile jasusi Paul lilivyokuwa limefanya, Stumke alitoa ulimi wake nje na kuukata haraka kwa meno. Kwa haraka, Willy alimtia ngumi moja Stumke halafu akamwacha akate roho kwa kutokwa na damu.
“Ama kweli majasusi hawa ni watu wa ajabu. Kujiua kwa kujikata ulimi ni jambo geni kabisa”, Willy alijisemea huku akielekea ndani ya nyumba. Mle ndani alikuta maiti ya mzee Hamisi. Hapo hapo akagudua kuwa mzee hamisi alikuwa amelazimishwa kumwita ili aje auawa kama yeye. Vile vile Willy aligundua kuwa kama majasusi hawa waliweza kuutumia uhusiano wake na Hamisi, basi tayari walikuwa na habari nyingi juu yao. Willy alijipongeza, bahati yake nzuri kwani mtego waliokuwa wamemwekea ilikuwa bahati kuukwepa.
Mara wazo likamjia. Alifikiri jinsi F.K. alivyokuwa anaaminiwa hapo Arusha kuwa mtu mwaminifu kwa Serikali na Chama. Kama kweli anahusika, bila shaka ndiye anayetayarisha mpango mzima. Mzee Hamisi asingeweza kumhisi kitu F.K. Ndio sababu waliweza kumwingia kwa urahisi. Mzee Hamisi alikuwa anajulikana kama mtu matata. Isingekuwa rahisi kwake kuuawa ‘kike’ hivyo. Willy aliamua kurudi alipokuwa amelala Stumke. Alimkuta bado hajakata roho kabisa. Alimpapasa ili kuona kama angepata kielelezo chochote. Hakukuta kitu bali funguo za gari. Alizichukua na kuelekea sehemu ya mbele ya nyumba.
Alikuta gari aina ya Benz. Alichukua kalamu yake ambayo ilikuwa na tochi vile vile, na kumulika kwenye karatasi ya bima iliyokuwa imebandikwa katika kioo cha mbele cha gari. Bima hiyo ilikuwa imechukuliwa kwa jina la Feroz Kassam. Kwa kutumia funguo zile zile, Willy alifungua mlango wa gari na kuingia ndani. Aliwasha gari lile na kuondoka. Wakati akiendesha Willy alijikuta akisema.
“We gari, nipeleke nyumbani kwenu, na leo hii bwana yako atanitambua!”.
“Jumba lenyewe ni lile pale”, Nyaso aliwaonyesha mara walipofika kwa F.K.
“Seng’enge yote ile mnayoiona imezunguka eneo la jumba hilo”, waliangalia eneo hilo kwa makini kwani kila sehemu ilikuwa inawaka taa.
“Hili ni jumba hasa”, Rocky alisema.
“Wacha kulishangaa kwa nje. Ndani yake ni zaidi. Siku moja mimi nililala humo. Mara nilisikia mlio wa vitu fulani kutoka chini. Nilipomwuliza nini ilikuwa, F.K alijibu huku akiwa mwenye nusu usingizi.
“Hao ni watu wanafanyakazi huko chini, wewe lala usiwe na wasiwasi. Mambo haya hayakufai! Siku hiyo ndiyo nilijuwa jumba hilo lilikuwa na vyumba chini ya ardhi. Siku nyingine F.K alifurahi sana halafu akanieleza kwamba, kama lingetokea jambo la dharura, jumba lile lina njia mbili za kutokea nje kupitia chini kwa chini. Aliongeza kusema kwamba njia moja ilitokea Magharibi na nyingine ilitokea Kusini mashariki mwa jumba hilo. Alinieleza pia kwamba kwa nje mtu yeyote angefikiri labda sehemu ya nje ni mahali palipofunikwa tu. Aidha mfuniko wa njia ulionekana kama ule wa machafu”, Nyaso alieleza huku akiendesha pole pole.
“Mimi naona usimame hapa. Sasa hivi ni saa nne kamili. Sijui utaegesha wapi halafu utasubiri, tusingependa waone gari lako”, Bon alimwambia Nyaso.
“Itawachukua muda gani?”, Nyaso aliuliza.
“Tupe nusu saa. Ukikuta hatujarudi, ujuwe mambo yameharibika. Hivyo utakwenda Hotelini na kumweleza Willy”, Bon alijibu.
“Una maana gani?”, Nyaso aliuliza.
“Usiniulize maswali, fanya kama nilivyokwambia kwani hiyo itakuwa rahisi kwako”, Bon alijibu kwa sauti kali kidogo.
“Haya bwana, mimi nakwenda kwa rafiki yangu hapo juu kwenye nyumba za wasabato. Saa nne na nusu juu ya alama nitakuwa hapa”, Nyaso alijibu.
“Sawa, tutakuwa tumejibanza kwenye mti ule pale”, Bon alieleza na halafu wakatelemka. Nyaso aliondoka huku roho ikimdunda.
Kufuatana na maelezo ya Nyaso, jumba hili linazo njia mbili za kuingilia kwa chini. Moja iko magharibi na nyingine iko kusini mashariki, wewe utaingilia magharibi na mimi nitapita kusini mashariki. Kama hatukuonana ndani basi tukutane mahali petu kabla ya saa nne na nusu”, Bon alimweleza Rocky.
Wote walitazamana kwa hisia zao zilizowajulisha kwamba walikuwa wanaingia mahali pa hatari. Huku wakiwa wamejidhatiti, walipeana mikono na kuingia kazini. Rocky alikuwa wa kwanza kuona mfuniko ulioziba mlango wa njia. Aliuinua taratibu na kuona ngazi za kutelemkia chini. Aliuweka kando mfuniko ule ili wakati wa kutoka nje usije ukampa tabu. Baada ya kufanya hivyo, alichukua tochi yake yenye saizi ya kalamu akamulika na kutelemka ngazi jambo ambalo Rocky hakufahamu ni kwamba wakati mfuniko ule ulipofunguliwa ulikuwa unapeleka miale ya ilani, ambayo ambayo ilionekana kwenye televisheni iliyokuwa chumbani, kwa ajili ya usalama.
Dave alikuwa ndani ya chumba cha kumi akiangalia helikopta ya namna yake ambayo ilikuwa chumbani tayari kwa ajili ya kuwachukua majasusi baada ya kufanya maovu yao. Mara alisikia jasusi mmoja kwa jina la Terre akimwita. Terre na wenzake wawili walikuwa wamejinyoosha kwa mapumziko. Aligutushwa na makelele kutoka kwenye televisheni pamoja na picha ya mtu aliyeonekana akiingia kwenye njia ya siri upande wa magharibi. Dave alipofika na kuona picha hiyo, aligundua mara moja kwamba yule alikuwa Rocky kutoka Zimbabwe. Dave aliweza kumtambua Rocky kwa sababu alikuwa ameonyeshwa picha za wapelelezi mashuhuri wa Afrika, majina yao na nchi walizotoka.
“Haya sasa, kazi imebaki kwenu. Huyu amejileta mwenyewe badala ya sisi kumtafuta. Terre na Gary nendeni kwenye mlango ule. Akifungua tu nataka mmalize mara moja. Sisi tunamwona lakini yeye hatuoni. Hivyo kazi yenu itakuwa rahisi. Hakuna haja yangu mimi kuhangaika. Nitakuwa nawaangalia kwenye televisheni. Sitaki mtumie bastola bali mikono yenu. Hapo ndipo watu hawa watatambua sisi ni nani”, Dave aliamrisha huku furaha imemjaa. Dave na Howe walikaa tayari kushuhudia mapambano ambayo yangefuatia.
“Huyu ni chakula chetu”, Terre alijibu huku akiondoka pamoja na Garry. Walikuwa wamepandwa na mori kwani walitaka kuonyesha uhodari wao, pia kuwa mtu wa kwanza kumuua mpelelezi mashuhuri wa Afrika. Bila kujua kuwa alikuwa anaonekana kwenye televisheni, Rocky aliendelea taratibu kwa tahadhari kubwa sana. Alipomaliza ngazi za kwanza, aliufikia mlango. Upande wa pili wa mlango, Terre na Garry alikuwa wakisubiri tayari.
Ili wamsaidie kuingia kwenye mtego, walikuwa wamefungua mlango na kuuacha umerudishiwa tu. Rocky alipojaribu kufungua mlango alikuta umerudishiwa. Kutokana na uzoefu wake wa kazi wa muda mrefu. Rocky alifungua mlango ghafla na kwa nguvu. Terre na Garry walitarajia Rocky angefungua taratibu na kuendelea kutembea. Badala yake alijirusha chini kwenye njia. Alifanya kitu ambacho hakikutarajia mpaka wakashindwa kufanya yale waliyokuwa wamepanga. Alijiviringisha chini na kujipinda huku akichukua bastola yake. Alifyatua risasi mfululizo ambazo zilimpata Terre na Garry. Wote wawili walikufa pale pale.
Dave na Howe ambao walikuwa wanafuatilia mapambano kwenye televisheni, walishangazwa na kitendo hicho cha Rocky chenye kuonyesha ujuzi wa hali ya juu.
Howe, twende tukamkabiri kwani naona mtu huyu ni hatari sana. Chukua bastola na mimi nipatie moja”, Dave alimwagiza Howe.
“Wewi ni Ninja, huyu atakuwa nini kwako?”, Howe alimpambisha Howe moto.
“Unasema kweli, kama hujaniona basi leo utaniona”, Dave alijigamba huku wanaelekea kwenye mlango katika njia ambayo Rocky alikuwa akitokea.
“Dave, nafikiri tusisogee kwenye mlango kwani mtu huyu anaweza kutufanya kama Terre na Garry. Heri tumsubiri hapa. Kwa kuwa chumba hiki ni kipana kiasi cha kutosha, hata kama akijirusha bila shaka ataimba tu”, Howe alisema huku akijitayarisha na kumwangalia Rocky kwenye televisheni kwa mara ya mwisho. Rocky aliendelea kunyata na kuusogelea mlango wa chumba kile cha mapumziko.
Mlango wa sita wa maarifa ulimjulisha Rocky kwamba chumba alichokuwa akisogelea kilikuwa cha hatari zaidi. Hivyo alichukua tahadhari zaidi. Alikuwa tayari amepandwa na mori wa kupigana. Kwa hiyo alijiona kuwa alikuwa na uwezo wa kupabana katika hali yoyote ile. Dave ambaye alikuwa amesimama pembeni karibu na mlango ule, alitarajia Rocky angejirusha chini baada ya kufungua. Badala yake Rocky aliruka hewani na kuufungua mlango kwa kuupiga teke akitumia miguu yake miwili. Wakati bado akiwa hewani, Rocky alijipinda na kutua njiani nyuma yake. Howe aliyekuwa anasubiri Rocky kwa hamu alifyatua risasi tatu ambazo zote zilikosa Rocky. Kitendo cha sasa cha Rocky kilikuwa hakikutarajiwa pia.
Dave alimtolea ishara Howe ili amfuate Rocky. Howe alijiviringisha chini kwenye njia huku akifyatua risasi ambayo ilimpata Rocky kwenye mkono wa kushoto karibu na bega. Wakati huo huo Rocky aliachia risasi ambayo ilimpata Howe kwenye paji la uso. Alikata roho pale pale. Akiwa anasikia maumivu makali. Rocky alikimbia mpaka nyuma ya mlango kulikokuwa na maiti ya Terre na Garry. Alirudisha mlango huo. Alichana shati lake mwenyewe na kujifunga mkono ili kuzuia damu isitoke kwa wingi. Dave alijuwa Rocky alikuwa ameumia hivyo alimfuata na kufungua mlango ule. Rocky alikuwa ameweka bastola yake chini. Dave aliruka na kumkumba Rocky na wote wakajiviringika chini.
“Rocky! Unakufa sasa”, Dave alisema kwa sauti ya juu. Rocky alikuwa anasikia maumivu makali lakini hali halisi ilimfanya asahau maumivu hayo. Aliinuka haraka akiwa tayari kukabiliana na jasusi hilo. Hapo mapambano makali yalianza. Dave alimshambulia Rocky kwa mapigo safi yapatayo saba lakini yote yalizuiwa. Hapo ndipo Dave alipogundua kuwa alikuwa anapambana na mtu mwenye ujuzi zaidi ya vile alivyotarajia. Hivyo aliamua kutumia mafunzo ya U-Ninja. Vile vile Rocky aligundua kuwa Dave alikuwa na ujuzi wa hali ya juu. Hivyo ilimbidi atumie mbinu kali kuweza kumshinda adui.
Dave alitupa ngumi lakini Rocky aliikwepa nayo ikagonga ukuta na kulitoa tofari moja lililoangukia upande wa pili. Wakati huo huo Rocky alichukua nafasi hiyo kumtia mapigo makali Dave ambayo yalimfanya aanguke chini. Hapo aliamua kuchukua bastola yake kwani aliamini kuwa mtu huyu hakuwa saizi yake. Hivyo alijirusha lakini kabla hajawahi kuichukua bastola yake iliyokuwa chini, Dave naye aliruka na kumwahi Rocky hewani alipompiga teke la kichwa. Rocky alipoteza fahamu na kuanguka chini kwa kishindo.
Bon alikuwa amenyatia toka chumba hadi chumba wakati alipofika kwenye chumba cha televisheni alimwona Dave anampiga Rocky teke la kichwa. Bon aligundua kwamba Rocky alipigwa teke la ki-Ninja ambalo asingeweza kulistahamili.
Bon alikimbia haraka kuelekea kwenye njia ambayo aliamini ndiko walikuwa wakipigania huku hasira na chuki zimemjaa. Rocky alikuwa anapigana kishujaa. Bon alipofungua mlango na kuingia kwenye chumba walichokuwa wanapigania, kumbe alikuwa amechelewa. Dave alikuwa amemrukia Rocky na kumpiga teke la moyoni ambalo lilimuua pale pale Rocky.
“Kufa mbwa mweusi, we!” Dave alitukana. Mara aliona mlango unafunguliwa ghafla na Bon akiingia ndani.
“Mbwa we, umemuua Rocky, nawe utaambatana naye mpaka peponi”, Bon alisema kwa uchungu huku machozi yakimtoka. Bon alikuwa na bastola mkononi. Angeweza kumpiga risasi Dave. Lakini badala yake aliitupa kando. Dave alishangazwa na kitendo cha Bon. Vile vile alimwonea huruma kwani aliamini hakuna mtu mweusi ambaye angepambana naye kwani yeye alikuwa ni Ninja.
“Pole sana mbwa mweusi! Na wewe umejileta kwenye kaburi lenu”, Dave alijibu kwa dharau. Bila kuchelewa Bon alimrukia Dave na kumpiga vipigo, moja baada ya kingine mpaka akaanguka chini. Lakini alijiviringisha na kuinuka haraka tayari kumkabiri Bon. Bon hakumpa nafasi kwani kabla hajasimama sawa sawa Dave alipewa vipigo kadhaa ambavyo vilimtatanisha. Pale pale alijuwa kwamba alikuwa anapambana na Ninja kama yeye mwenyewe, Bon aliruka na kumtia Dave teke la ubavuni na kumzidishia hasira.
Bon alimwahi Dave na kumpiga teke moja la shingoni na jingine la kichwani kwa wakati ule ule, ambayo yalimfanya Dave achanganyikiwe. Bon alipima hali ya Dave na kuona mbaya. Hivyo alichukua nafasi hiyo na kumtia pigo takatifu la kifuani ambalo lilikibomoa na kufanya damu ifumke na kutapakaa kila mahali. Kabla dave hajaanguka chini, Bon alimwonyesha kiganja na kama kusema. ‘pigo linalofuata ni kisasi cha Rocky! Alimzibua tumbo na kuyatoa matumbo ya Dave nje’.
“Kufa Kaburu mshenzi, we!” Bon alisema kwa hasira. Dave alianguka chini akiwa maiti. Bon aliangalia saa yake. Ilikuwa saa tano kasoro dakika tano.
Ilikuwa yapata saa tano hivi wakati Willy alipokuwa anaegesha gari la F.K karibu na ofisi za mjini za mauzo ya General Tyre. Alikwenda haraka kwenye hoteli yake. Alibisha hodi kwenye chumba chake Mike akamfungulia.
“Vipi mwenzetu, mbona umenuna”, Mike alimwuliza Willy.
“Hatari, akina Bon hawajarudi?”, Willy aliuliza.
“Bado, mimi nina wasiwasi mkubwa”, Mike alisema, “Je, umeonana na mzee Hamisi?”.
“Mzee Hamisi ameuawa. Sasa hivi mtu wetu ni F.K. Hivi ninavyokueleza, nimeshaua makaburu wanne”, Willy alisema na kisha alianza kumsimulia Mike yote yaliyotokea.
“Hivyo Mike, hapa mjini kuna kundi kubwa la makaburu wenye ujuzi mkubwa wa kupigana”, Willy alimalizia.
“Kama ni hivyo, mimi napendekeza tulivamie jumba hilo kwani bila shaka majasusi wako humo. Nashauri kwamba kama ikibidi, tuombe msaada wa polisi ama jeshi”, Mike alisema.
“Hapana Mike, kazi ya kupambana na majasusi haistahili kuhusisha polisi ama jeshi, kwani wao wanaweza kutumia mbinu za kijeshi tu na kusababisha maafa makubwa. Inatubidi sisi wenyewe tufunge vibwebwe na”…. kabla hajamaliza sentensi, alisikia mtu anabisha hodi kwa kugonga mlango. Bastola za wanaume hawa zikawa tayari mikononi. Kwa tahadhari kubwa. Willy alifungua mlango huku bastola yake mkononi.
“Ni mimi….”, Nyaso alisema kwa hofu alijikuta amekabiliana na mtutu wa bastola.
“Pole, usiwe na wasi wasi”, Willy alisema huku akimvuta Nyaso ndani na kuurudisha mlango.
“Wenzako wako wapi?”, Mike alimwuliza Nyaso huku akitweta.
“Waliniambia niwapitie saa nne na nusu. Nilipokwenda kwenye sehemu tuliyoagana, sikuwakuta. Hapo mwanzo walikuwa wamenieleza kwamba kama nisingewakuta basi ilibidi nije moja kwa moja huku ili niwaambie nyinyi”, Nyaso alijibu huku machozi yakimlenga. Willy aliangalia saa yake na kuona kwamba ilikuwa saa tano na dakika kumi za usiku.
“Nyinyi subirini hapa. Mimi nitakwenda kuchunguza nini kimetokea, maana tukiondoka wote tunaweza kupishana nao, hivyo tutakuwa tumewachanganya. Nipeni mpaka saa sita na nusu, kama hamkuniona basi mjuwe mambo yameiva hivyo njooni”, Willy aliwaambia.
“Hapana Willy, tuondoke wote. Nyaso atabaki hapa ili kama akina Bon wakirudi atawaambia watufuate”, Mike alisisitiza.
“Hapana Mike, Willy halielewi sawa sawa lile jumba. Sharti nifuatane naye ili nimwelekeze”, Nyaso alisema.
“Sawa Mike, utabaki hapa nami nitafuatana na Nyaso. Akisha nionyesha atarudi hapa. Kama ikifika saa sita na wewe hujaniona, basi nifuate”, Willy alitamka.
“La hasha, mimi nitabaki huko na wewe….”, Nyaso alisema na huku Willy akimkatisha.
“Nyamaza! Wewe unajuwa watu wale pamoja na bwana yako ni wauaji. Je, unataka kufa ama nini”, Willy alisema kwa ukali.
“Hebu usiniambia kuwa bwana yangu ni muuaji! Kuna tofauti gani kati yake na wewe. Nyote wauaji tu. Kwani mimi nilifahamu kuwa yeye ni muuaji?”, Nyaso alijibu kwa hasira. Willy alishikwa na hasira nusura ya kumnasa kibao Nyaso. Lakini Mike aliingilia kati.
“Basi basi, acheni hayo. Tunapoteza muda wetu. Wewe Nyaso usipende kugombana na wanaume. Utaumia. Mpeleke Willy kama alivyokwambia.
Nyaso alimtazama Willy kwa macho ya upendo. Alimkimbilia na kujilaza kifuani kwake huku akisema kwa sauti nyororo.
“Samahani Willy, sikuwa na maana hiyo. Nakupenda, tafadhali jihadhari”, Willy alimvuta na wote wakatoka nje.
“Nawatakia kila la heri”, Mike alisema.
“Ahsante!”, Willy na Nyaso walijibu kwa pamoja wakati wakitoka nje.
MAMBO BADO
Ilikuwa yapata saa sita kasoro dakika kumi wakati Bon alipobisha hodi kwenye chumba cha Willy, huku akiwa na bastola mkononi tayari. Mike alikwenda kufungua. Akiwa tayari kabisa, aliruka haraka upande.
“Lo! Mungu wangu vipi?”, Mike aliuliza baada ya kumwona Bon”.
“Willy yuko wapi?”, Bon aliuliza kabla ya kujibu.
“Amewafuata”, Mike alijibu.
“Kama nusu saa hivi. Nyaso amempeleka na atarudi si muda mrefu. Rocky yuko wapi?”, Mike aliuliza.
“Mike. Rocky ameuawa”, Bon alijibu.
“Hapana”, Mike alisema bila kuamini.
“Ukweli ni kwamba watu hawa ni majasusi wa hali ya juu. Twende tumfuate Willy. Huko njiani nimeona gari likielekea nyumbani kwa F.K. likiwa limejaa watu. Iwapo Willy yuko peke yake, atapata matatizo. Heri tumfuate kwani hatuwezi kumpotenza na Willy pia. Mambo mengine nitakueleza njiani. Kwani hatuna muda. Nyaso akirudi anaweza akatusubiri hapa hapa”, Bon alisema.
Bila kusema neno Mike alichukua zana zake na wanaume wakatelemka chini. Mbele ya hoteli walipungia taksi na kupanda.
“Tupeleke Themi Hill”, Bon alimwamrisha dereva. wakaondoka.
Willy alipopata fahamu kidogo akajikuta ndani ya chumba kikubwa. Alikuwa amefungwa kwenye mti mfano wa msalaba uliokuwa katikati ya chumba. Ingawa Willy alikuwa amepata fahamu huku akiumwa sana na kichwa, hakuonyesha kama amepata fahamu. Alifanya hivyo ‘kununu muda’ Alishangaa kukuta majasusi walikuwa bado hawajamuua. Hapo hapo aligundua kuwa walikuwa na sababu ya kumweka hai. Kwa kutumia sababu hiyo aliweza kununua muda zaidi. Alijikuta amefungwa barabara kiasi kwamba asingeweza hata kujitingisha.
Mara alisikia mlango unafunguliwa na taa kali zaidi zinawashwa na kuelekeza mwanga wake kwake. Pale pale Willy alitambua kuwa chumba kile kilikuwa chumba cha mateso. Alikuwa amevuliwa nguo zake zote na kubaki na chupi tu.
“Hecke, bila shaka umempiga sana mtu huyu, nusura umwue. Unajuwa mtu huyu tunamhitaji sana angalau kwa muda wa dakika tano zaidi akiwa hai”, F.K alisema. Willy aliyasikia maneno hayo.
“Mtu huyu ni hatari sana F.K. Hecke alichofanya ni sawa sawa”, mtu mmoja alisema na Willy akamsikia.
“Sharti turudishe fahamu yake maana yule mwenzake anaweza kuwa anajongea kwa wakati huu”, F.K. alisema.
“P.G yuko nje tayari kumfungia kazi. Hecke na wewe nenda nje ukamsaidie P.G. kama ikibidi. Akidiliki kupitia njia ile ya chini kama alivyofanya mwanzo, huo ndio utakuwa mwisho wake, kwani nimemtegeshea bomu moja safi”, George alijigamba.
“Hebu kwanza Hecke, nenda ukawashe ile swichi ya umeme ili umshitue mbwa huyu kwani amezirai muda mrefu”, F.K. alimwamrisha Hecke. Willy akajiweka tayari huku akili yake ikifanya kazi haraka haraka. Hecke alikwenda akawasha swichi. Umeme ulimshitua Willy naye akajifanya kaupata fahamu tayari ili asiumizwe zaidi. Alipofungua macho alimwona F.K. amesimama mbele yake pamoja na George. Kule pembeni alimwona Hecke.
“Karibu kwetu Willy Gamba. Ni jambo lisilofurahisha kukukaribisha hapa nyumbani kwangu katika hali hii. Lakini umeyataka mwenyewe na kama ujuavyo msiba wa kujitakia hauna kilio. Haya, huyu hapa ni mwenzetu na kiongozi wetu Geoge ambaye anaongoza kikundi cha ‘KULFUT’ kilichotumwa kuja kuifundisha adabu Tanzania”, F.K alisema akiwa anamtazama Willy. Baadaye alimgekia George.
“George, huyu ndiye Willy Gamba kama umewahi kumsikia. Ni bahati yake mbaya kwamba amekutana na wewe”, F.K. alisema.
“Hata mimi nimefurahi kumwona, nimesikia habari zake nyingi. Nasikitika kumwona katika hali hii, hata anapokuwa amefikia mwisho wa maisha yake haya yote yametokana na nchi ya Tanzania kujiweka kimbelembele na kujiingiza kwenye mambo yasiyowahusu”, George alijigamba.
Aliposikia hayo Willy alianza kuzungumza ilimradi aweze kusukuma wakati.
“F.K… ni lazima umweleze kaburu huyu swala la ukombozi Kusini mwa Afrika ni swala la Afrika huru nzima. Hivyo kwa watu kufa ili vizazi vilivyobaki viweze kuwa huru ni jambo takatifu. Kwa hiyo mimi sina wasiwasi na kufa”.
“Hecke, hebu nenda huko nje ukamsaidie P.G. kumumaliza huyo mbwa mweusi mwingine kwani naona hawa wana vichwa vigumu kama vya paka”, George alimrisha.
“Kitu kimoja ambacho unapaswa kuweka maanani Willy ni kwamba, mtu mweusi hawezi kujitawala. Sana sana atapata uhuru wa bendera lakini uchumi wenu utatawaliwa na mtu mweupe daima. Chukua mfano wa Tanzania ni nani anayefaidi matunda ya uhuru hapa kama siyo mzungu na mhindi?, Mhindi akiendesha Benz ni halali yake; thubutu mtu mweusi aendeshe Benz kama hakutiwa msukosuko. Sasa, kisa gani hata kupoteza maisha yenu kwa kupigania uhuru wa bendera ambao huna faida? kweli mtu mweusi hawezi…”, F.K. alisema na kukatizwa.
“F.K. unazungumza maneno ya kitoto. Nchi huru za Afrika zinapigana dhidi ya ubaguzi kwa sababu hazitaki ubaguzi. Nyinyi wahindi mnaonekana kama watanzania machoni mwa watanzania. Mawazo yako katika kuhusu uhitilafiana kimapato ni jambo lililopo Ulimwenguni kote. Amini usiamini, kama usaliti wako utagunduliwa, hata kama mimi nitakuwa nimekufa, wahindi wenzako watakuwa wa kwanza kutamani kukurarua. Siyo wahindi wote wenye mawazo finyu kama yako”, Willy alimwambia F.K.
“F.K. unamchelewesha huyu mtu. Hebu muulize atupe habari zetu halafu… Usiku unakwenda haraka sana”, George alimwambia F.K.
“Kusema kweli Willy nilipenda kifo chako kije haraka. Hata hivyo huo ni uamzi wako. Kama utajibu swali langu, utakufa haraka bila kupata mateso. La hasha, utakufa pole pole na kwa uchungu mkubwa. Chumba hiki kina kila aina ya vifaa vya kutesea. Sina haja ya kukueleza kwani wewe mwenyewe ni mwenyekiti katika shughuli hii. Sasa jibu swali langu: Viongozi wa wapigania uhuru wamefichwa wapi?”, F.K. aliuliza. Mara Willy aligundua kwamba mpango wa kuwaficha viongozi wa wapigania uhuru ulikuwa wa busara sana.
“Sijui. Kawatafute wewe mwenyewe. Kwani sisi tulipogundua hawa makaburu ulipowaficha ulituambia?”, willy alijibu kwa kiburi. Jibu hilo liliwafanya wahamaki. George alimrukia Willy na kumtia makonde ya haraka haraka mpaka Willy akapoteza fahamu kwa muda.
“Sisi hatutaki mchezo. Tumekuja Tanzania kuwatia hofu na kiwewe. Jibu lako litatusaidia kuua viongozi peke yake kuliko kufagilia mbali umati wa watu na mji mzima wa Arusha. Kipigo tutakachotoa kitasikika mpaka huko ahera. Nyumba hii imejaa silaha za kisasa za kuweza kuuteketeza mji mzima. Sasa sema ama hakika utaumia”, F.K. alisema kwa hasira. Willy alifahamu fika kwamba hakuna mtu ambaye angethubutu kumuua, kwani alijuwa wao walitaka kufahamu viongozi wa wapigania uhuru wako wapi. Hilo ndilo jambo muhimu lililokuwa limewaleta.
“Sijui walipo, fanya unavyotaka”, Willy alijibu.
“Umeyataka mwenyewe”, F.K. alijibu huku akitoa kitu mfano wa saa kutoka kwenye mfuko wa shati na kukiwasha. Mara Willy alijisikia moto unamchoma kutoka kwenye ncha ya kidole mpaka utosini. Alijaribu kuvumilia. Lakini uchungu ulizidi na Willy akaanza kupoteza fahamu. Bila ya kujifahamu Willy alitoa sauti kali.
“Aaaaaa! Nitakuelezeaaa!”.
Wakati F.K na George wanamkabiri na kumtesa Willy katika kile chumba cha mateso, Bon na Mike walikuwa wamefika kwenye seng’enge ya jumba la F.K. tayari kwa mapambano makali.
“Tusipite kwa chini maana wanayo televisheni watatuona. Tupite njia ya kawaida ila tujuwe kuwa wanatusubiri”, Bon alisema.
“Sawa”, Mike alijibu.
“Pande zote mbili, kushoto na kulia zinayo madirisha makubwa. Jambo la kufanya ni kujitahidi kuingia na sisi tuonane huko ndani”, Bon alimweleza Mike. Wote waliangaliana ili kupeana moyo.
“Jihadhari sana”, Mike alimweleza Bon.
“Na wewe vile vile”, Bon alijibu huku akimkumbuka marehemu Rocky aliyekuwa amemuaga kwa namna ile.
“Jambo la kwanza ni kuangalia kama Willy angali hai. Nina wasi wasi juu ya maisha yake”, Bon alimnong’oneza Mike huku wakiachana. Mike alimuonyesha ishara ya kumwelewa Bon. Wakiwa wamejificha kwenye vivuli wanaume hao wawili walilisogelea jumba la F.K. kwa tahadhari na hamasa kubwa.
Mike aliambaa ambaa katika upande wake; mara alisimama kimya na kwa tahadhari alijaribu kusikia kila aina ya jambo ambalo lingetokea. P.G alikuwa upande wa kaskazini wa jumba lile. Mara alimwona Hecke aliyekuwa achunge upande wa kushoto wakati yeye P.G akichunga upande wa kulia.Wakati P.G alipokuwa anaambaa na ukuta wa kulia huku bastola mkononi. Mike naye alishafika kwenye ukuta ule ule akiangalia akiangalia namna ya kufungua dirisha bila kuwashitua watu waliokuwa ndani.
Mara P.G. alisikia jasho jembamba likimtoka. Pale pale alijuwa kuwa alikuwa katika hali ya hatari kwani hali hiyo humtokea mara tu hatari inapobisha hodi. Mike ambaye alikuwa amevaa nguo nyeusi alisogea mbali kidogo kutoka alipokuwa kwani naye alihisi kitu kinatembea karibu na ukuta ule. Alibana chini ya mti huku macho yake yamezoea giza. Mara alikia kitu kama mti kinakatika! Alipoangalia umbali wa mita mbili kutoka chini ya mti alipokuwa amesimama aliona kitu kinatingishika. Alipoangalia vizuri aliona mtu anasogea. Mike alisimama kama mti mkavu. P.G. naye alikuwa ananusa nusa huku na kule kama mbwa wa polisi huku bastola yake tayari kufyatuliwa wakati wowote.
Alipotembea na kufika sehemu ya mita moja kutoka mahali Mike alipokuwa amesimama, naye alisimama. Wakati huo huo Mike aliruka kama risasi. Alimkumba P.G. na wote wawili wakaanguka chini. Bastola ya P.G. ilianguka kando na kuzitema risasi zake. mlio wake haukusikika ndani ya jumba kwa sababu bastola ile ilikuwa na kiwambo cha kuzuia sauti. Walipoinuka, Mike alimtambua P.G. mara moja.
“Ni bahati iliyoje kwangu P.G.? Nilidhani umenikimbia huko Nairobi. Sasa mimi na wewe”, Mike alisema na kumshangaza P.G. ambaye hakutarajia kukutana na Mike Arusha.
“Umejileta wewe mwenyewe kwenye kifo chako Mike Maina. Baada ya kukumaliza wewe nitarudi Nairobi. Kisha nitajibadilisha na kuhakikisha vile vikaragosi vyako kwenye ofisi yenu ambao walitaka kuharibu kazi yangu nawafagilia mbali. Kwa kutumia uwezo wangu wa kipesa, nitahakikisha Masoga anakuwa mkuu wa idara yenu…” P.G. alisema. Kisha alikatisha sentesi ili amchukue Mike kwa ghafla ili amtie ‘mapigo ya kifo’, kama yeye alivyokuwa anayaita. Lakini P.G. alipotupa mapigo yake hayo Mike aliyazua yote kwa ufundi wa hali ya juu.
“Nilimwahidi Mwaura kwamba nitalipa kisasi chake kwa mikono yangu mwenyewe. Sasa P.G. umekufa”, Mike alisema na pale pale aliona sura ya maiti ya Mwaura ilivyokuwa imepigwa risasi. Mori ulimpanda. Alijisikia akipata nguvu zisizo kifani. Mike alimtia pigo la kifuani P.G. ambalo karibu lingemdondosha. Lakini alijitahidi na kurudishia mapigo makali sana. Mike aliteleza mpaka chini. P.G alivuta upanga wake ili ammalize Mike. Upanga ulikuwa umefichwa kiunoni. Huku akiamsha upanga, tayari kumkata Mike P.G. alisema.
“Burian Mike!”, wakati huo huo Mike alijiviringisha na upanga ukamkosa, P.G. alijirusha na kujitayarisha tena kumkata Mike. Alimkosa mara ya pili na mara ya tatu. Mike aliruka na kuumpiga teke mkono ule wenye upanga ambao ulianguka chini. Mkono wa P.G. ulikuwa umevunjika. Maumivu yalikuwa makali na Mike alichukua nafasi hiyo. Mike alimtia P.G. kipigo cha mbavu ambazo zilivunjika. P.G. aliamua kujikakamua lakini akawa amezidiwa mbinu.
“P.G. Afrika itashinda na Afrika Kusini itaondokana na udhalimu wa ubaguzi wa rangi na kuwa huru chini ya wazalendo walio wengi. Ukiwa huko ahera utaona kuwa unyama wenu haufui dafu kwa wapigania haki. Hata Mwenyezi Mungu yuko kwenye upande wa wanyonge”, Mike alimwambia P.G. ambaye alikuwa anatokwa damu puani na masikioni. Alijua alikuwa amekaribia mwisho wake lakini aliamua kama ni kufa ilibidi afe kiume. Alikusanya nguvu zake zilizobakia na kumrukia Mike. Lakini Mike alikuwa tayari. Hivyo alimpisha P.G. ambaye alijigonga kwenye ukuta na kuanguka chini. Mike alichukua ule upanga wa P.G. na kuutumia kumkata kichwa.
“Malipo ya dhambi ni mauti”, Mike alisema huku akiwa ameinua upanga na kuangalia maiti ya P.G. Akiwa bado amepandwa na mori alivunja dirisha kwa kutumia upanga akiwa tayari kwa mapambano makali.
“Leo ni leo. Liwalo na liwe. Sisi na washenzi makaburu “, Mike alisema huku akipanda dirisha ili ajitose ndani.
Baada ya kumtelemsha Willy, Nyaso alielekea New Arusha Hoteli huku akiwa na mawazo mengi sana juu ya Willy. Kitu kimoja kilimshangaza sana na jinsi alivyokuwa ametokea kumpenda kijana huyo. Alikuwa amempenda ghafra kiasi cha kuhatarisha maisha yake wakati alikuwa hamjui sawa sawa kijana huyu.
“Kweli dunia ni msongamano”, Nyaso alijisemea huku akiegesha gari karibu na hoteli.
“Mtoto huyo”, dereva mmoja wa taksi kati ya wale walioegesha nje ya New Arusha alimnong’oneza mwenzake.
“Sijui mtoto huyo ana nini. Labda F.K. amesafiri kwani namwona anayo njemba moja hivi”, dereva mwingine alijibu.
“Ni kweli hata mimi njemba huyo nimemwona. Jamaa mwenyewe mkali na vitu anavyoweka toka chini mpaka juu ni vya ukali tupu”, dereva wa tatu alisema.
“Yule ni saizi yake siyo huyo F.K. ambaye anafuja mtoto wa watu bure”, dereva wa pili aliongeza huku wakichekelea. Wakati huo Nyaso alishatoka kwenye gari na alikuwa anapotea hotelini. Macho ya watu hao yakimfuata yeye.
“Ama kweli Mungu ana upendeleo angalau kwa kiumbe yule”, kijana mmoja wa mapokezi alimnong’oneza mwenzake baada ya Nyaso kuwapita na kusimama akisubiri lifti.
“Huyo msichana mimi simwangalii kwa sababu nikifanya hivyo najisikia msisimko. wakati najuwa fika kwamba hata nishitakie mbingu, siwezi kumpata”, mwenzake alijibu.
“Si lazima kupata kila kitu ukipendacho. Hata macho pekee yanatosha kuangalia tu. Mimi ninapoona sura yake humsifia Mungu muumba; halafu kusema kwamba kuna wanaume duniani waliobahatiwa”, yule kijana wa kwanza alisema kwa masikitiko.
Bila kujuwa kuwa watu walikuwa wanauguwa roho kutokana na sura yake murua. Nyaso alipanda lifti. Alikuwa na wazo moja tu kwamba kama angekuta akina Bon wamerudi angewataka wamfuate Willy. Alifikiri kwamba kama kweli F.K. amemuua Tondo hata Willy atauawa kama hakujihadhari.
Nyaso alifika kwenye chumba cha Willy. Alibisha hodi lakini hakupata jibu. Alibisha mara ya pili lakini kukabaki kimya. Aligonga tena mara hii kwa nguvu lakini bado hakujibiwa. Mara alitokea kijana mmoja mhudumu katika hoteli alisema huku akitabasamu.
“Samahani dada, nimeona jamaa wanaondoka haraka haraka”.
“Wangapi”, Nyaso aliuliza.
“Wawili”, yule mhudumu alijibu.
“Ahsante”, Nyaso aliitikia huku nusu akitembea nusu akikimbia, alielekea kwenye ngazi. Alikuwa na wazo la kuwafuata akina Bon na Mike huko kwa F.K. kwani aliamini Willy alikuwa kwenye hatari. Yule mhudumu alimwangalia Nyaso kwa butwaa.
“Ama kweli duniani kuna wanaume! Mimi nikiwa na miadi na msichana kama huyu siwezi kutoka hata itokee nini. Labda niambiwe mama yangu kafariki”, yule mhudumu alijisemea mwenyewe.
Wakati mapambano makali yalipokuwa yanaendelea kati ya Mike na P.G. Bon alikuwa anafanya kazi ya kuingia ndani ya jumba la F.K. Hakupata kipingamizi kikubwa. Alipofika kwenye ile sehemu ya kushoto, aliona maiti ya yule askari aliyeuawa na Willy. Aligundua kuwa Willy alikuwa amepitia njia hiyo. Wakati anaangaza ili kuona Willy alikuwa ameingilia dirisha gani, alimwona yule askari mwingine akija. Bon alibana sawa sawa na ukuta akimwangalia askari anasogea kwa wasiwasi na hofu kubwa. Hofu yake iliweza kumfanya yule askari afike mahali alipokuwa Bon bila kuhisi kitu.
Bon aliyekuwa amebana mithili ya kinyonga afanyavyo kunasa inzi, alisubiri mpaka wote wakawa sambamba. Alimvuta na kumtia kabari kisha akamnyang’anya bastola. Alimpekuwa na kukuta hana kitu. Pale pale akimwamrisha.
“Kama unataka kuishi zaidi, nipeleke alipo Willy Gamba. Najuwa yuko ndani”, Bon alibahatisha. Hofu ni kitu kibaya sana. Binadamu anaposhikwa na woga, hupoteza uwezo wa kuamua, hivyo akatenda yale ambayo asingeyafanya katika hali ya kawaida.
“Usiniue, twende nikuonyeshe”, Hecke alisema kwa hofu.
Hecke alijua hiyo ndio ilikuwa nafasi yake ya mwisho. Alijuwa angemfikisha Bon kwa George, basi huo ndio ulikuwa mwisho wake hivyo Hecke alimwongoza Bon mpaka kwenye chumba cha mateso.
FUNGA KAZI
“Hapa”, sema sasa nakupa sekunde moja”, F.K. alimwambia Willy. Willy ambaye alikuwa amejitahidi kupitisha muda akitafuta njia ya kujiokoa alijuwa kuwa sasa amepatikana. Mara wazo lilimjia ghafla … F.K. alikuwa ameshika chombo mkononi. Kazi ya chombo hicho ilikuwa ni kuendesha (kwa mbali), mashine ya umeme ambayo ilikuwa kwenye mti ambao Willy alikuwa amefungwa….. Kama angeweza kukata umeme huo kwa njia yoyote ile, basi mfumo mzima wa chumba kile ungeathirika.
Huku akijifanya kana kwamba alikuwa hajapata fahamu sawa sawa, alichunguza kwa chati ile nguzo alikokuwa amefungiwa. Aligundua kuwa ilikuwa na magurudumu chini. F.K. na George walikuwa hatua moja mbele yake. Hivyo Willy aliamua kutenda jambo ambalo wasingeweza hata kufikiria maisha yao yote. Lakini kwa bahati Willy hakupata nafasi ya kutenda kitendo hicho kwani vitu viwili vilitokea ghafla.
Mlango wa nyuma ulifunguka ghafla na kwa nguvu Bon alimsukumiza ndani Hecke. Hecke alimkumba George na F.K. kutoka kwa nyuma na wote wakaingukia ile nguzo alikofungiwa Willy. Kukatokea kishindo kikubwa.
“Kisanduku hicho hapo juu”, Willy alipiga kelele.
Kana kwamba walikuwa wamepanga shambulizi hilo kutoka kushoto. Mike alivunja dirisha kubwa la kioo. Huku akiwa na rungu na upanga mikononi, alitumbukia ndani kupitia dirishani. Alikuwa amekatwa na vipande vya kioo lakini alionekana kutotambua. Vitendo hivyo vilitokea ghafla mno kiasi kwamba George na F.K. walipoteza sekunde mbili ama tatu kabla ya kujua nini kilikuwa kimetokea.
Hapo hapo Bon na Mike walichukua nafasi hiyo kufanya kitendo kimoja kwa haraka. Mike alikata kamba alizokuwa amefungiwa Willy kwa kutumia upanga mkali. Bon alikipiga risasi kile kisanduku kama alivyoelezwa na Willy. Mara chumba kikawa giza. Kisanduku kile ndicho kilikuwa kikitumika kuendesha vyombo vya chumba kizima cha mateso.
Kitu cha kwanza ambacho George na F.K. walifanya ilikuwa kujihami. Kama njiwa, George aliruka na kupitia kwenye diridha ambalo Mike alikuwa ameingilia. Lakini pamoja na vurugu hilo Willy alikuwa amemwona. Alitenda vitendo karibu kwa wakati mmoja. Alifungua kamba na kuruka dirishani akimfuata George.
F.K. alijiviringisha na kumkumba Bon mpaka chini. Halafu alipitiliza mpaka kwenye mlango na kukimbilia ukumbini. Bon aliinuka na kumfuata. Hecke aliliwahi lile rungu aliloingia nalo Mike. Alihamaki na kumpiga Mike akaenda chini. Upanga ulimtoka Mike mkononi.
Hecke aliukimbilia ule upanga, lakini kabla hajaushika Mike alimpiga teke la farasi ambalo lilimpeperusha mpaka akaenda chini. Wakiwa wanaonana vyema kutokana na mwanga uliokuwa unatoka kwenye chumba cha pili. Mike alimrukia tena Hecke na kumtia dhoruba ya kichwa wakati Hecke alipokuwa anajaribu kusimama. Hata hivyo, wote wawili walianguka chini. Dhoruba ya Mike ilimfanya Hecke aone nyota na barabara iendayo ahera. Mike alisimama haraka na kuchukua upanga wake. Kama alivyofanya P.G. aliikata shingo ya Hecke na kichwa chake kikaanguka chini.
“Makaburu wenzako watakaposikia juu ya staili ambayo umechinjwa, bila shaka watagwaya, kamwe hawatathubutu kuichezea Afrika huru”, Mike alijisemea kimoyomoyo. Akiwa na upanga wake mkononi. Mike alitoka mbio na kuwafuata wenzake ili afahamu ni kitu gani kilikuwa kikifanyika.
Willy aliporuka na kupitia dirishani, alimkuta George anamsubiri tayari. Alikuwa amewasha taa ambayo swichi yake ilikuwa karibu na dirisha hilo. George alikuwa amesimama. Alimwonyesha Willy ishara ya vita vya maninja. Pale pale Willy aligundua kuwa George alikuwa ninja. Bila kuchelewa Willy alipiga magoti na kuinamisha kichwa. Hiyo ilikuwa ishara na imani yao. Kwa kutumia viganja vyake, Willy ‘alisema’ sala ya ninja vidole vya mikono yake vinaingiliana na kuachama kama meno ya mamba. George naye alifanya vile vile kama Willy alivyofanya. Kama kawaida sala yao ilichukua kama muda wa dakika kumi. Ndipo vita kali ilipoanza.
III
F.K. alikimbia na kutoka nje ya nyumba. Alibana karibu na mlango akimsubiri Bon ambaye alikuwa anamfuata. Bon alitokea akikimbia F.K. alimtegea na kumkata ngwara. Bon alianguka chini. F.K. aliruka haraka na kumpiga Bon teke la ubavuni kabla hajasimama na kurudi chini. F.K. alimtupia teke la pili. Alikuwa na nia ya kumpiga kichwani, lakini Bon alikuwa macho. Aliudaka mguu wa F.K. na kumfanya aanguke chini Mara wote waliinuka na kukabiliana.
“Leo ndio mwisho wako F.K”, Bon alisema.
“Hee, nyie hamjui nguvu ya Afrika Kusini kijeshi. Hata mkituua sisi haiwezi kuwasaidia. Zaidi ya hayo mtazidisha hasira ya makaburu. Hapo ndipo mtakapokiona cha mtema kuni. Vitendo vyenu vitafuatiwa na mashambulizi ya kutisha. Vitendo hivyo vitazisanya nchi zilizo mstari wa mbele na Afrika huru kwa ujumla kukoma ubishi. Kamwe hamtaichokoza tena serikali imara ya Afrika Kusini”, F.K. alijigamba.
“La hasha! Sisi tutawaangamiza nyinyi vibaraka na majasusi wa makaburu. Baada ya hapo. Serikali ya Afrika Kusini itatambua kuwa Afrika sasa ni imara. Zaidi ya hayo, kipigo tutakachotoa kitawatia hamasa wapigania uhuru wa Afrika Kusini. Vile vile vijana mashujaa wa Afrika Kusini watapata moyo wa kuendelea kupambana kwa nguvu zaidi. Na lazima makaburu watasalimu amri…. Na sasa hivi kifo chako kimefika, msaliti wee”, Bon alisema.
Mara Bon alimrukia F.K. na kumpa vipigo vinne vya haraka haraka. F.K. alipepesuka huku damu zikimtoka midomoni. Hapo hapo F.K. aligundua kuwa hakuwa na uwezo wa kupambana na Bon Sipele.
F.K. alikuwa anafikiri haraka ni nini cha kufanya. Mara aliona gari lilikuwa njiani kuelekea kwenye nyumba yake. Aliangalia taa zake, akagudua kuwa gari lile lilikuwa aina ya Benzi. Na zaidi ya hayo Benzi hilo lilikuwa la kwake mwenyewe F.K. Katika mawazo yake F.K. alifikiri kwamba Stumke alikuwa ndani ya gari hilo. Alidhani kuwa alikuwa amemtoroka Willy na kuwafuata AICC. Mawazo yake yalimdanganya. Hali hiyo ilitokana na woga mwingi uliokuwa umemwingia F.K. kwa mara yake ya kwanza alifikiria kifo na woga wake ukaongezeka. Kufumba na kufumbua F.K. alitimua mbio kuelekea kwenye gari hilo lililokuwa linakuja kwa mwendo wa kasi. Bon alishangazwa na mbio za F.K. Alianza kumfukuza. Mara alijiwa na mawazo kuwa huenda wale walikuwa adui. Hivyo alisimama na kujiweka tayari kwa mapambano ya ziada.
Wakati ule ule Mike alikuwa ameshika upanga wake mkononi. Alikuwa amemuua Hecke. Baadae alimfuata Bon ili kumuongezea nguvu. Alipotoka nje, alimwona F.K. anatimua mbio huku akifukuzwa na Bon. Hivyo Bon naye aliamua kuwafukuzia. Alipomwona Bon anasimama naye akasimama pembeni. Mike alihisi vile vile wale walikuwa maadui. Gari hilo lilizidi kuja kwa kasi. F.K. alilikimbilia kwa kasi pia. Alikuwa ameinua mikono juu kama ishara ya kutaka lisimame. Bon na Mike walibaki wamesimama kushuhudia tukio hilo. Kitendo kilichofuata, kiliwashangaza. Badala ya gari hilo kupunguza mwendo, lilienda kasi zaidi kuelekea kwa F.K. ambaye alijaribu kulikwepa. Hata hivyo lilimkumba.
“Eeeeh! Nakufa!”, F.K. alisema maneno yake ya mwisho. Alipogongwa, alirushwa juu na kuangukia kwenye seng’enge.
Bon na Mike waliona gari hilo likisimama mahali pale lilipokuwa limeegeshwa gari la Mzee Hamisi. Wote wawili walifichama nyuma ya mti. Walishangaa zaidi kuona mtu aliyeshuka kwenye gari hilo alikuwa Nyaso.
“Nyaso”, Bon alimwita. Mike akaelekea kule ilipoangukia maiti ya F.K.
“Willy yuko wapi?”, Nyaso alihoji huku machozi yakimtoka. Pale pale Bon aliwakumbuka Willy na George. Mambo hayo yalikuwa yemetendeka haraka sana.
“He! He! Hapa… hapa”, sauti zilisikika.
“wako huku”, Bon alimshika Nyaso mkono wakaenda mbio. Walielekea kule sauti zilikokuwa zimetokea. Hata hivyo Bon alikuwa bado ameshangazwa kitendo cha msichana huyu. Ilikuwa vigumu kwake kuelewa jinsi Nyaso alivyomgonga na kumuua bwana yake halafu asijali. Utafikiri hakuna jambo lililokuwa limetokea; ama kwa Nyaso alikuwa amegonga mbwa!.
“Ni vigumu kuwaelewa wanawake”, Bon alijisemea kimoyomoyo.
Walifika sehemu walikokuwa Willy pamoja na George. Ilibidi Bon amshike Nyaso ambaye alikuwa ameshikwa na kiwewe. Sababu ilikuwa ni kwamba vita vya maninja vilikuwa vimeanza.
“Willy! Willy! Ooooh”, Nyaso aliita.
“Nyamaza! Hivi ni vita vya maninja. Sikiliza Nyaso. Wote wawili ni maninja. Maana yake ni watu wenye ujuzi wa hali ya juu wa kupigana. Wote wawili wamehitimu mbinu za hali ya juu za mapigano ziitwazo ninja. Sheria yao inasema maninja wawili wakianza kupigana, watu wengine hukaa kando. Mapigano huisha babada ya mmoja wao kuuawa”, Bon alimweleza Nyaso kwa haraka.
“Hivi unaweza kumwacha Willy auawe ati kwa sababu ya sheria?, mimi nakwenda kumsaidia”, Nyaso alisema huku akijaribu kujitoa mikononi mwa Bon.
“Kama Willy atauawa mimi nitachukua nafasi yake. Hii ni “sanaa” ya mauaji, nayo ina miiko yake. Hata mimi mwenyewe ni ninja”, Bon alisema huku akimwangalia Nyaso usoni. Kwa mara ya kwanza Nyaso aliona macho ya Bon yamegeuka na kuwa kama hayana uhai.
“Mimi sikujuwa kama watu walio hai wanaweza kuwa maninja. Nilidhani ni hadithi tu ama michezo ya sinema. Mpaka sasa siamini”, Nyaso alisema huku machozi yakimtoka.
Willy na George walikuwa wametazamana. Bon alimshikilia Nyaso kwa nguvu zaidi. Alipogeuka nyuma alimwona Mike amejiegemeza kwenye ukuta. Alionekana kuwa na wasiwasi. Bon alipomwangalia Mike alitoa ishara kuonyesha kwamba F.K. alikuwa amekufa. Hapo hapo wote waligeuza macho yao kuangalia mapigano makali yaliyokuwa yameanza. Mbinu zilizotumika zilikuwa za hali ya juu. Hata Bon mwenyewe alikiri. Pamoja na yeye kuwa ninja. Alikuwa hajaona mapigano makali kama hayo.
“George aliruka juu. Kana kwamba alikuwa anatembea hewani, alirusha mateke kumi mfululizo. Willy aliyakwepa yote. Kabla hajatua chini. George alichomoa upanga kutoka mgongoni mwake. Akaanza kumkabiri Willy.
Mike alihamaki akataka kuingia kwenye uwanja wa mapambano. Bon alimpa ishara ya kuzuia. Nyaso aligeuka na kulala kifuani mwa Bon. Alihofia Willy angeuawa wakati wowote. George alirusha upanga wake mara saba. Nia yake ilikuwa ni kumkata Willy. Lakini hakuweza kufanikiwa. Willy alikuwa ni mwepesi kama unyoya. Ghafla George aliruka juu na kumkuta Willy hayuko tayari. Bon na Make walifumba macho. Ilikuwa vigumu kuamini jinsi Willy alivyojipindua. Upanga wa George ulimpita kwenye mkono. Ulichana shati yake na kumkata kidogo.
Damu ilianza kumtoka Willy. Hata George mwenyewe alishangaa jinsi Willy alivyokwepa upanga huo. Willy aliangalia damu yake. Hasira ilimpanda. Alisikia harufu ya damu mpaka ule upanga akauona si kitu kwake. Alichana shati lake na kulitupa. Halafu alimrukia George na kumpiga dhoruba ambayo hakuitarajia. Aliupiga mkono wake wa kulia ambao ulikuwa umeshika upanga. Upanga uliruka na kuanguka karibu na miguu ya Bon. Kishindo cha upanga kilimshitua Nyaso. Aligeuka na kushuhudia jinsi Willy alivyokuwa akimtandika yule kaburu.
“Willy alimpiga George mapigo matano mfululizo, ambayo yalimfanya achanganyikiwe.
“Willy, muuee! muuee”, Nyaso alipiga kelele. Lakini George alijibu mapigo. Alimpiga Willy kichwa cha aina ya pekee mpaka wote wawili wakaanguka chini. George aliwahi kuinuka, mara hii alitoa kisu kirefu. Halafu alimrukia Willy ili ammalize. Lakini Willy alikuwa macho. Aliruka kutoka mahali alipokuwa na George akamkosa. Bila kuchelewa Willy akamtupia George teke la tumbo akaanguka chini. Katika kuanguka kisu kilimtoka mkononi. Willy alitumia nafasi hiyo. Alimpiga George pigo la pekee ambalo lilimbomoa kifua. George alijuwa amekwisha.
“Aaaa! Nakufa! Willy, heri ungenikata kichwa ili nife kwa heshima za kininja”, George alisema Bon alimtupia Willy upanga. Willy alikata kichwa cha George kwa pigo moja.
Nyaso alikurupuka kutoka mikononi mwa Bon, alimkimbilia Willy na kumkumbatia.
Aaaah. Willy! Siamini”, Nyaso alisema kwa sauti kali. Bon na Mike walibaki wameduwaa.
“Haya tutoke hapa haraka, kazi iliyobaki ni ya polisi”, Willy aliamrisha. Nyaso alitoa kitambaa na kumfunga mkono Willy. Wote waliingia ndani ya gari la F.K. Ingawa lilikuwa limevunjika taa za upande wa kulia. Willy aliendesha na wote wakarudi mjini.
“Hallo!”, sauti ilisikika kwenye simu.
Hallo, mimi naitwa Willy Gamba”.
“Ndiyo mzee”, Kamanda wa polisi wa mkoa alijibu kwa hofu. Alikuwa amepokea simu kutoka kwa Inspekta Jenerali wa Polisi kutoka Dar es Salaam. Alikuwa ameambiwa asitoke nyumbani mpaka Willy ampigie simu.
“Haya sikiliza. Rafiki yako F.K. amekufa. Vile vile kuna rafiki zake wamekufa. Mzee Hamisi naye amekufa na maiti yako nyumbani kwake. Tondo pia ni maiti. Yapo nyumbani kwake. Naamini sasa unajuwa cha kufanya”, Willy alieleza, wakati wakitelemka kwenye gari, kamanda aliuliza.
“Mzee Hamisi amekufa. Amekufa saa ngapi”.
“Kati ya saa tatu na nusu na saa nne”, Willy alijibu.
“Hiyo haiwezekani. Mimi nilipata habari kuwa mnamo saa nne na robo Mzee Hamisi alikuwa kwenye jengo la mikutano la AICC”, Kamanda alisema.
“Yeye mwenyewe ama gari lake?”, Willy aliuliza.
“Eah! Askari wanaolinda huku waliripoti kuonekana gari lake. Halafu waliripoti kuwa chumba kilichotayarishwa kwa ajili ya mkutano kiliwashwa taa. Wao walifikiri Mzee Hamisi alikuwa anaangalia na kuhakikisha usalama, kama kawaida yake”, Kamanda alijibu.
“Haya, wewe shughulikia taarifa niliyokupa na kwa heri”, Willy alijibu na kukata simu. Mawazo ya Willy yalikuwa yanakwenda haraka haraka.
Willy alipiga simu kutoka hotelini kwake New Arusha Hotel. Alikuwa na wenzake akiwemo Nyaso.
“Anasema nini?”, Bon alimuuliza Willy. Willy alimweleza maneno ya Kamanda.
“Kama ni hivyo F.K. na wenzake waliweza kuingia kwenye chumba cha mkutano. Na kama waliingia walifanya nini?”, Mike aliuliza.
“Maneno yako ni kweli. Bila shaka walikuwa na sababu”, Willy aliitika. Kisha aliinua simu na kupiga namba ya mwandalizi wa mkutano wa wapigania uhuru.
“Hallo”.
“Hallo. Willy hapa”.
“Lete habari. Nimekaa nikisubiri kwa hamu hata mate hayamezeki. Wazee wana wasiwasi mkubwa. Kwani wanapiga simu kila baada ya dakika kumi. Heri tupate taarifa yako. Vinginevyo, kabla ya asubuhi watakuwa wamekufa kutokana na ugonjwa wa moyo”, mwandalizi wa mkutano alisema. Willy alimweleza kwa kirefu yote yaliyokuwa yametokea.
“Hure? Afrika huru imeshinda”, alijibu kwa ghafla na furaha kubwa.
“Kwa hiyo mkutano utaendelea kesho kama ulivyopangwa. Waeleze wazee kwamba sasa kazi kwao, kazi yetu sisi vijana wao tumeimaliza”, Willy alisema.
“Sijui watawashukru vipi”, yule mtu alisema huku akionyesha furaha.
“Hivi si wewe unayeshughulikia maandalizi ya mkutano?”, Willy aliuliza.
“Ndiyo”.
“Basi, naomba tuonane huko. Sisi tunakwenda huku sasa hivi.
“Oke!”.
“Haya sasa twendeni. Tayari nimepata wazo. Wewe Nyaso lala na kupumzika. Hayo uliyoyafanya yanakutosha kwa siku moja”. Willy aliwaambia wenzake.
“Nani abaki hapa? tunakwenda wote”, Nyaso alijibu huku tayari akiwa amefika mlangoni.
“Tunaomba vitambulisho”, askari wa ulinzi kwenye jumba la mkutano, AICC waliwaambia akina Willy. Willy alitoa kitambulisho chake. Mmoja wao alikiangalia na kushituka. Aliwaruhusu haraka huku akiwa kama anataka kupiga saluti. Walipoingia kwenye uwanja walikuta yule mtu wao ameshafika.
Alikuwa amekaa juu ya boneti ya gari akizungumza na askari mlinzi. Willy alimfahamisha kwa wenzake.
“Huyu mtoto umempata wapi?”, aliuliza.
“Huyu ni kuruta wetu”, Willy alijibu kwa mzaha. Wote walicheka, baadaye waliingia kwenye chumba cha mkutano. Mkutano ungeanza masaa machache kutoka wakati huo. Waliongozwa na yule askari mlinzi. Willy aligusa mlango ukafunguka.
“Mliacha mlango wazi?”, Willy aliuliza.
“Nadhani”, mwandalizi alijibu huku akiwasha taa. Wote waliangaza huku na huko.
“Kuna kitu chochote kigeni ambacho hamkukiacha humu ndani ama kukipanga?”, Willy aliuliza.
Walizunguka kote halafu mwandalizi wa mkutano akasema.
“Naona ni kama vitu vyote viko kama tulivyoviacha”.
“Kwani Willy unafikiri vipi”, Bon aliuliza.
“Ni dhahiri kwamba iwapo F.K. na wenzake waliingia ndani. Halafu askari walinzi wakafikiri alikuwa ni Mzee Hamisi eti baada ya kuona gari lake. Bila shaka watu hao walikuja kufanya hujuma ndani ya chumba hiki. Ni lazima kuna kitendo wamekifanya. Ni kazi yetu sisi kufahamu kitendo gani. Baada ya hapo kazi yetu itakuwa imekwisha. Vinginevyo kazi yetu haijakamilika kamwe”. Willy alisema.
“Maneno yako ni kweli tupu”, Mike aliitikia.
Mara nyingine ni vigumu kuelewa jinsi gani mambo fulani hutokea. Kwa muda wote huo Nyaso alikuwa amesimama kimya. Alikuwa mbali kidogo na Willy ambaye wote walikuwa wakimsikiliza. Yeye alikuwa amevutiwa na jambo moja ndani ya chumba hicho. Vyombo vya kuzima moto hapo ukutani vilikuwa vimepangwa kisanii.
Vyombo hivyo vilikuwa vimepangwa juu ya ukuta. Kwa pande zote nne vyombo hivyo viliangaliana kimoja na kingine jumla ya vyombo vilikuwa kumi na nne.
“Willy”, Nyaso aliita. Willy alimsogelea.
“Unasemaje mtoto?”, Willy aliuliza.
“Yeyote yule aliyepanga hivyo vyombo vya kuzimia moto?”, Willy aliuliza.
Yule mtu aliangalia ule mpangilio wa vyombo hivyo. Halafu alimwangalia Willy kwa mshangao. Pale pale wote wakawa wamegundua sababu ya mshangao wake. Pale pale walihisi jibu.
“Hapana, vyombo vyote vilikuwa chini. Na jumla yake vilikuwa vinne tu katika chumba kizima”, alijibu kwa kufadhaika.
Wanaume walipanda juu. Mike alikuwa wa kwanza kugundua ni nini kilikuwa ndani ya vyombo hivyo”.
“Willy, ujuzi na uzoefu wako umeisaidia Afrika huru. Majasusi walitega mabomu ndai ya vifaa hivi. Mabomu yenyewe yanaendeshwa na mitambo yenye saa”, Mike alisema kwa masikitiko. Nyaso aliyasikiliza yote hayo. Lakini hakuamini masikio yake.
“Heri tumekuja na mtoto huyu. Kuja kwake kumetupa faida; kweli naawambia wanawake wazuri wanayo mashetani yao”, Bon alisema kiutani. Lakini Nyaso hakuwa katika hali ya utani bali alibaki ameduwaa. Ungedhani kapigwa dafrao. Mambo yaliyokuwa yametendeka, yalikuwa yamemzidi kimo. Vyombo vyote vilitelemshwa. Nane kati ya kumi na nne vilikuwa na maboni ndani yake. Kwa kutumia ujuzi wao waliyategua kwa uanalifu mkubwa. Willy alimwendea Nyaso na kumbusu.
“Ahsante sana Nyaso. Nikumbushe kesho nikununulie pipi”, Willy alisema.
“Ahsante, Nitaisubiri hiyo pipi. Lakini hata hivyo sasa hivi ni asubuhi”, Nyaso alijibu. Willy aliangalia saa na kugundua ilikuwa ni karibu saa kumi na moja alfajiri.
“La, twende tukapumzike. Sasa ni saa kumi na moja. Kazi yetu tumeimaliza. Imebaki ya wazee”, Willy alishauri.
“Sawa kabisa. Sasa tuseme wewe mwenzetu unakwenda na sisi ama ndio mambo yamekunyookea”, Mike alimtania Willy.
“Eti unasemaje mtoto. Maana sasa neno lako kwangu ni sheria. Ukisema nife, nakufa. Ukisema fufuka, nitafufuka”, Willy alimwambia Nyaso.
“Tuwarudishe hotelini. Halafu wewe utakuwa mgeni wangu. Unakumbuka kwamba uliniahidi kitu, na mpaka sasa hujatimiza ahadi yako”, Nyaso alisema.
“Bwana weee, tulepeleke kwanza sisi halafu uende ukatimize ahadi. Ahadi ni deni”, Mike alieleza.
“Ningekuwa na bahati kama ya Willy ya kumpata mtoto kama huyu, mimi nisingepoteza hata dakika, kwanza kabisa mtoto mwenyee siyo wa kawaida”, Bon aliongeza.
“Eeh, jamani! Mnanifanya nione aibu”, Nyaso alinena.
“Achana na hao. Ndivyo walivyo. Tutawapeleka kwanz halafu twende kula vyetu”, Willy alisema.
“Ahsante mwenzetu. Tukebehi tu”, Mike alijibu wote waliekea kwenye gari.
“Askari hakikisha hamtoki kwenye chumba cha mkutano”, Bon aliwaagiza askari wanaolinda chumba cha mkutano AICC. Ambao walikuwa wanatweta kwa jasho kwani ilikuwa vigumu kwao kuamini kuwa chumba walichokuwa wakilinda kilikuwa na mabomu. Pamoja na hayo, kundi la akina Willy hawakuona ajabu wala kuogopa. Wao walikuwa wanafurahi kana kwamba hakuna jambo la hatari lililotokea. Walikuwa wanataniana kwenye hali ya hatari. Hata hivyo walijitahidi na kujibu.
“Ndio afande”, walimwaga yule mwandalizi wa mkutano.
“Tutaonana baadaye. Kesho ni kazi kwenu wazee. Sisi kazi yetu tumemaliza. Tunakwenda kutumia matuna ya uhuru wa Afrika”, Willy alisema kwa mzaha.
“Sijui niwashukru vipi, kazi yenu ni ukombozi kwa Afrika nzima, Afrika ina deni kubwa kwenu”, alisema mwandaaji wa mkutano huku Willy na wenzake wakimuaga na kupanda gari kuondoka.
Waliingia ndani ya gari. Mwanga wa mapambazuko uliwaongoza vijana hawa shujaa wa Afrikal. Walikuwa tayari wamemfungia kazi kaburu. Walikuwa wameipa hamasa Afrika huru ili kusaidia wapigania uhuru wa Afrika Kusini.
Wakati wananchi walipokuwa wanaamka kutoka usingizini, mashujaa hawa ndio kwanza walikuwa wanakwenda kulala. Walikwenda kuota ndoto za kweli za ushindi dhidi ya utawala wa makaburu, ambaye ni adui namba moja wa Afrika. Makaburu…
NI FUNDISHO
“Hebu jamani, tusikilize taarifa ya habari”, msichana mmoja aliwanyamazisha wenzake, Akina Bon na Mike walikuwa wamekaa kwenye bustani ya New Arusha Hoteli. Kipaza sauti kilikuwa kimetundikwa kwenye mti katikati ya bustani.
“Hivi kuna habari gani kwenye taarifa ya habari mpaka watu wote wanasogea kusikiliza. Utafikiri kumezuka vita”, Mike aliuliza kwa mshangao.
“Wewe unakaa Yerusalemu ya wapi?. Hata usijue matukio yaliyotokea jana usiku hapa mjini?”, msichana mwingine alimuuliza Mike kwa kebehi.
“Mimi sujui”, Mike alijibu.
“Sasa tulia usikilize”, alisema.
“Haya mtoto”, Mike alijibu na taarifa ya habari ikaanza.
“Sasa ni saa moja kamili”.
“Ifuatayo ni taarifa ya habari kutoka Radio Tanzania. Dar es Salaam… Arusha. Habari za kuaminika kutoka Arusha zinasema kuwa vijana shupavu wa Afrika wamevunja ngome ya makaburu. Ngome hiyo iliyokuwa chini ya majahili wa jeshi la “KULFUT” ama Gongo la chuma iliyoundwa na makaburu kwa lengo la kuongeza hofu kwa nchi huru za Afrika. Kikiongozwa na tajiri wa mjini humo aitwae Ferozali Kassam ama F.K. Kimeteketezwa kabisa. Vyombo na vifaa vingi vya kisasa kwa ajili ya uimarisha ujasusi vimekamatwa. Nia ya kikundi hicho kuweka ngome mjini Arusha ilikuwa kuhujumu mkutano wa wapigania uhuru ambao hata hivyo umeanza leo mjini humo. Habari za kuteketeza ngome hiyo zimepokelewa kwa shangwe kuu na wakuu wa nchi huru za Arika.
“Hata hivyo kiongozi mmoja wa wapigania amezionya nchi huru za Afrika. Amesema ni lazima kuwa macho kwani aduni sasa ameanza kutangatanga. Kwa sababu maji yamewafika shingoni. Vile vile ameiomba jumuia ya Kimataifa kuzidi kuwabana makaburu kiuchumi ili kuleta mabadiliko ya haraka nchini Afrika Kusini. Kwa lengo la kuutokomeza ubaguzi wa rangi na kuleta utawala wa walio wengi. Amewaonya makaburu kuwa mapambano ya silaha yatazidi ndani ya Afrika Kusini. Hakuna kurudi nyuma.
“Habari zingine kutoka Pretoria. Afrika Kusini zinasema: Baada ya makaburu kupata habari ya kuteketezwa kwa ngome ya ‘KULFUT’, mapambano mapya na makali yamezuka. Mpaka tunakwenda hewani mapambano makali yalikuwa yanaendelea. Wazalendo katika kitongoji cha Soweto wanapambana vikali na polisi wa makaburu….”.
“Mmesikia sasa”, yule msichana wa pili aliwauliza.
“Tumesikia mtoto. Lililobaki sasa ni sisi kucheza na kula vyetu huku tukishangilia ushindi. Tutumie vyetu mpaka liamba”, Mike alijibu.
“Mwenyezi Mungu akupe nini”, yule msichana wa kwanza alisema.
“Napendekeza tuondoke hapa, twende kutumia sehemu nyingine. Maana leo ni leo, asemaye kesho ni muongo”, Bon alisema huku akiinuka. Alimshika mkono msichana aliyekuwa karibu naye. Aliondoka taratibu. Mike naye alifuatia huku macho ya watu yakiwafuatlia pia.
II
“Hebu nikuulize Nyaso. Kwanini uliamua kumuua F.K”, Willy alimwuliza Nyaso. Wakati huo alikuwa anajigeuza kifuani. Baadaye alimkumbatia.
“Nisingependa wewe kunikumbusha jambio hilo. Huo ni mzigo wangu. Ni heri niubebe mimi mwenyewe”, Nyaso alijibu taratibu.
“Oke, mtoto”, Willy aliitika taratibu halafu alimbusu.
“Willy”.
“Ehe”.
“Kazi yako tumeimaliza. Lakini sasa ni mwanzo wa kazi nyingine mpya. Kazi hiyo ni yangu. Unakumbuka wewe mwenyewe uliniahidi”, Nyaso alisema kwa sauti nyororo.
Willy alimwangalia Nyaso. Alimgeuza humo ndani ya shuka walilokuwa wamejifunika. Alimbusu tena. Alimwangalia machini kwa mahababa. Mara akamwambia.
“Nikumbushe kesho. Kwa sasa hivi ni kazi tofauuti. KILA KAZI NA WAKATI WAKE”.
MWISHO WA HOFU
Isikupite Hii: Jinsi Ya Kumfanya Mwanamke Akupende Kwa Mara Ya Pili
Also, read other stories from SIMULIZI;
